Хто не любіць печанай на вогнішчы духмянай бульбы?! Сядзіш каля вогнішча, падкідваеш вугольчыкі і чакаеш, пакуль спячэцца. А затым палачкай выкочваеш па адной, разломваеш — і вакол разносіцца непаўторны пах. Здаецца, нічога смачнейшага ў свеце няма! А калі да гэтай трапезы дадаць нарэзанага тонкімі скрылікамі сала… Гэта цудоўныя моманты майго дзяцінства і юнацтва. Не зайздрошчу тым, хто па той ці іншай прычыне не пакаштаваў у сваім жыцці такой смакаты. Але тут быў і другі бок медаля, мусіць, як і ў любой справе. І гэта капанне бульбы. Зразумела, уручную.
Сённяшнія работы па ўборцы бульбы ўсё больш механізаваны, ды і плошчы пад другі хлеб значна меншыя, чым раней. На дадзены момант, напрыклад, у раёне толькі пяць гаспадарак займаюцца вырошчваннем бульбы. І самыя вялікія плошчы (220 га) у філіяла «Айчына» ААТ «Белавежскі», дзе і пабывалі карэспандэнты «раёнкі».
У сельгаставарыстве сур’ёзна ставяцца да любой справы, у тым ліку і да вырошчвання бульбы. Падрыхтоўваецца глеба, уносяцца арганічныя ўгнаенні пад пасадку, і, адпаведна, праводзяцца хімпраполкі падчас росту. Па словах галоўнага агранома гаспадаркі Дзмітрыя Цімановіча, не на апошнім месцы ў гэтай справе і выбар сартоў. Перавагу аддаюць бульбачцы беларускай селекцыі, традыцыйна высаджваюць сярэдняспелыя «брыз» і «скарб», сярэдняпозні «маніфест». Сёлета адвялі плошчы і пад «ветразь», таксама сярэдняпозні беларускі сорт бульбы сталовага прызначэння, які, да таго ж, адрозніваецца стабільнай ураджайнасцю і мае добрыя спажывецкія якасці.
На палетку ў 70 га каля вёскі Смаляны на ўборцы бульбы працаваў механізатар Мікалай Кот. Ён расказаў, што бульбаўборачным камбайнам «Грымэ» за дзень яму ўдаецца ўбіраць бульбу на палетку плошчай каля 5 га, а гэта, у сваю чаргу, недзе 190 тон клубняў.
Сёлета радуе і ўраджайнасць — 300 ц/га. Бульба з поля адвозіцца на бульбасховішча ў аг. Харава, дзе праводзіцца сартаванне. Харчовую — у камеры, а некандыцыю адпраўляюць на крухмальны завод. Насенны матэрыял у памеры 1000 тон будзе закладзены на будучы год (дарэчы, тут пакуль не плануюць павялічваць плошчы).
Тых, хто мае жаданне пакаштаваць смачнай бульбачкі, філіял «Айчына» ААТ «Белавежскі» запрашае на штогадовы восеньскі кірмаш.
Вадзім Раўнейка. Фота Алега Сідарэнкі