Суббота, 13 апреля 2024

Аляксандр Лукашэнка звярнуўся да суайчыннікаў з выпадку 80-годдзя трагедыі ў Хатыні

69

Прэзідэнт Беларусі Аляксандр Лукашэнка звярнуўся да суайчыннікаў з выпадку 80-годдзя трагедыі ў Хатыні. Аб гэтым БЕЛТА паведамілі ў прэс-службе беларускага лідара.

«У самотную дату — 22 сакавіка — мы ўспамінаем жыхароў вёскі Хатынь, тысяч іншых нашых вёсак і гарадоў, па-зверску знішчаных фашыстамі ў гады Вялікай Айчыннай вайны. Вайны, якая бесцырымонна ўварвалася ў наш дом і забрала кожнага трэцяга беларуса, — адзначыў кіраўнік дзяржавы. — 80 гадоў таму веснавы сонечны дзень быў абпалены агнём бязлітаснай расправы нацысцкіх карнікаў над мірнымі людзьмі».

Аляксандр Лукашэнка адзначыў, што ў кожным кутку Беларусі ёсць гісторыя сваёй Хатыні. «Балюча ўсведамляць, колькі новых жыццяў так і не з’явілася на свет, колькі дзяцей не пасталела, колькі лёсаў абарвалася з-за вар’яцкіх ідэй, сляпой нянавісці і крывавай жорсткасці», — падкрэсліў Прэзідэнт.

«Праз гады горыч і гнеў не сціхаюць. Асабліва сёння, калі чума нацызму набыла паслядоўнікаў сярод наёмнікаў, здраднікаў і злачынцаў і блізка падабралася да нашых граніц, — гаворыцца ў звароце. — У беларусаў для іх быў і застаецца адзін адказ — дух усенароднага супраціўлення. Яго сімвал — няскораны чалавек, які, паўстаўшы жывым з агню, з целам мёртвага сына на руках скрозь час нясе вечны праклён фашызму».

«Абавязак тых, хто жыве цяпер, перад загінулымі — выкрыць вінаватых у масавым генацыдзе, беражліва захоўваць памяць аб тых страшных падзеях і не даць бядзе зноў разыграцца на нашай святой зямлі, — падкрэсліў Прэзідэнт. — Светлая памяць усім загінулым! Вечная слава іх бессмяротнаму подзвігу ў імя міру для будучых пакаленняў!»

Зварот Прэзідэнта Беларусі з выпадку 80-годдзя трагедыі ў Хатыні

Дарагія суайчыннікі!

У самотную дату — 22 сакавіка — мы ўспамінаем жыхароў вёскі Хатынь, тысяч іншых нашых вёсак і гарадоў, па-зверску знішчаных фашыстамі ў гады Вялікай Айчыннай вайны. Вайны, якая бесцырымонна ўварвалася ў наш дом і забрала кожнага трэцяга беларуса.

80 гадоў таму веснавы сонечны дзень быў абпалены агнём бязлітаснай расправы нацысцкіх карнікаў над мірнымі людзьмі.

У кожным кутку Беларусі ёсць гісторыя сваёй Хатыні. Балюча ўсведамляць, колькі новых жыццяў так і не з’явілася на свет, колькі дзяцей не пасталела, колькі лёсаў абарвалася з-за вар’яцкіх ідэй, сляпой нянавісці і крывавай жорсткасці.

Праз гады горыч і гнеў не сціхаюць. Асабліва сёння, калі чума нацызму набыла паслядоўнікаў сярод наёмнікаў, здраднікаў і злачынцаў і блізка падабралася да нашых граніц.

У беларусаў для іх быў і застаецца адзін адказ — дух усенароднага супраціўлення. Яго сімвал — няскораны чалавек, які, паўстаўшы жывым з агню, з целам мёртвага сына на руках скрозь час нясе вечны праклён фашызму.

Абавязак тых, хто жыве цяпер, перад загінулымі — выкрыць вінаватых у масавым генацыдзе, беражліва захоўваць памяць аб тых страшных падзеях і не даць бядзе зноў разыграцца на нашай святой зямлі.

Светлая памяць усім загінулым! Вечная слава іх бессмяротнаму подзвігу ў імя міру для будучых пакаленняў!

Аляксандр Лукашэнка.

22 сакавіка 2023 г.