Уручэнне пашпартоў 15 сакавіка, у Дзень Канстытуцыі, ва ўрачыстай абстаноўцы стала ў Беларусі добрай традыцыяй. Яе прытрымліваюцца і на Пружаншчыне: акцыя Беларускага рэспубліканскага саюза моладзі «Мы — грамадзяне Беларусі!» прайшла ў 13-ы раз. 
Сёлета ўручэнне самага важнага дакумента стала запамінальнай падзеяй для двух дзясяткаў 14-гадовых школьнікаў з Ліноўскай, Кляпацкай, Навасёлкаўскай і гарадскіх школ.
У вялікай зале райвыканкама, дзе прайшла ўрачыстая цырымонія, пашпарты ім уручыў намеснік старшыні Пружанскага райвыканкама М.П.Кудравец. «Атрыманне пашпарта ў такі дзень абавязвае кожнага маладога чалавека адчуваць адказнасць, якую яны пачынаюць несці,» — зазначыў Мікалай Пятровіч, звяртаючыся да адрасатаў акцыі. Ён пажадаў кожнаму з маладых людзей з гонарам несці праз усё жыццё пачуццё грамадзяніна Беларусі і па магчымасці пакінуць на роднай зямлі слаўны след.
Віншаванні гучалі і з вуснаў бацькоў, вайскоўцаў, прадстаўнікоў грамадскасці. У зваротным слове, якое ад імя моладзі трымала вучаніца гімназіі Юлія Масайла, дзяўчына абяцала спраўдзіць чаканні, якія на іх ускладае старэйшае пакаленне.
Акрамя таго, да гэтай даты прымеркавалі яшчэ адну падзею — уступленне ў рады ГА «БРСМ». Членскія білеты гэтай маладзёжнай арганізацыі і Канстытуцыю Рэспублікі Беларусь у падарунак атрымала больш за дваццаць чалавек — вучні Слабадской СШ і СШ №5 г.Пружаны. Першы сакратар раённай арганізацыі ГА «БРСМ» Аляксандр Бабігорац, карыстаючыся магчымасцю, падзякаваў мясцовай уладзе за магчымасць арганізаваць такую ўрачыстую падзею для лепшых прадстаўнікоў маладога пакалення.
Марына ВАКУЛЬСКАЯ.
ФОТА Сяргея ТАЛАШКЕВІЧА.