Мала расліну пасадзіць, за ёй патрэбны належны догляд. Інакш цяжка разлічваць на багаты ўраджай. Асабліва калі ўзяць пад увагу наш зменлівы клімат: то дажджы заліваюць, то завіруха, то холад, то сонейка занадта грэе. Ды і зямля мае свой рэсурс. Не забываем, канечне, пра шкоднікаў і захворванні, якія з кожным годам прагрэ-сіруюць. Каб пазбегнуць гэтых негатыўных момантаў, і выкарыстоўваюцца розныя прэпараты для абароны раслін.
Пра іх эфектыўнасць, тэрміны выкарыстання ў мінулы чацвер і гаварылі ўдзельнікі абласнога семінара «Дзень поля», што арганізавалі камітэт па сельскай гаспадарцы і харчаванні Брэсцкага аблвыканкама і кампанія «BASF» у Рэспубліцы Беларусь, якая і спецыялізуецца ў тым ліку на абароне раслін. Да ўдзелу ў семінары былі запрошаны галоўныя аграномы і аграномы па абароне раслін сельгаставарыстваў Брэстчыны, спецыялісты інспекцый па насенняводстве, каранціне і ахове раслін і кампаній, якія займаюцца распрацоўкай адпаведных прэпаратаў. Усім была ўручана навуковая літаратура па доглядзе сельгаскультур.
Асноўная ж частка мерапрыемства прайшла на палетках ААТ «Велікасельскае Агра», дзе былі размешчаны стэнды са схемамі абароны сельгаскультур і тлумачэннем эфектыўнасці таго ці іншага прэпарата. Вітаў прысутных галоўны аграном гаспадаркі Сяргей Капіца, які і пажадаў усім плённай працы ў Дзень поля. Паспелі ахапіць сем палеткаў: з азімым і яравым ячменем, кукурузай, гарохам, азімым трыцікале, азімай пшаніцай і азімым рапсам. На кожным начальнік Пружанскай раённай інспекцыі па насенняводстве, каранціне і ахове раслін Ігар Гаманчук падрабязна расказваў прысутным пра выкарыстоўваемы ў ААТ «Велікасельскае Агра» насенны матэрыял, яго апрацоўку і наступны догляд раслін. У сваю чаргу прадстаўнік кампаніі «BASF» прадставіў сваю прадукцыю, расказаў пра яе перавагі ў барацьбе з хваробамі сельгаскультур.
Што можна дадаць? Канечне, выбар таго ці іншага прэпарата ўсё роўна застаецца за самімі гаспадаркамі. Як думаецца, галоўнае — гэта рэзультат. Таму жадаем сельгаставарыствам усёй вобласці здаровых усходаў і багатых ураджаяў.
Вадзім Раўнейка. Фота Кацярыны Масік
Больш фота глядзіце ў альбомах у нашых групах https://vk.com/album-23306785_302918448 і https://ok.ru/budni/album/979559345032