Наша спадчына ў нашых руках!

Аргкамітэт рэспубліканскай акцыі «Фэст экскурсаводаў» прапаноўвае гісторыкам, краязнаўцам і прафе-сійным экскурсаводам краіны арганізаваць і правесці ў сваім рэгіёне  20-21 красавіка бясплатныя экскурсіі па самых цікавых, але малавядомых месцах і маршрутах.

Акцыя прымяркоўваецца да Міжнароднага дня помнікаў і гістарычных месцаў, праводзіцца пры падтрымцы Міністэрства культуры і Беларускай асацыяцыі экскурсаводаў і гідаў-перакладчыкаў і пройдзе ў нашай краіне ўжо пяты раз. Яе галоўная ідэя — прыцягнуць увагу людзей да тых гістарычных і прыродных помнікаў, побач з якімі яны жывуць і каля якіх праходзяць кожны дзень.

Гаворка ідзе менавіта пра помнікі, якія «не на віду» і пра якія мясцовыя жыхары мала што ведаюць. А між тым менавіта адсутнасць цікавасці да часцяком закінутых і візуальна няяркіх аб’ектаў мінулага прыводзіць да іх запусцення і знікнення.

З гэтай прычыны арганізатары акцыі і абралі фармат «фэсту» ў выглядзе шматлікіх бясплатных экскурсій у розных рэгіёнах Беларусі. У мінулым годзе такія экскурсіі для мясцовых жыхароў правялі краязнаўцы, экскурсаводы і музейныя работнікі ў больш чым 20 гарадах, пасёлках і вёсках Беларусі.

Калі вы займаецеся даследаваннем гісторыі Пружанскага краю і вам ёсць, што расказаць сваім землякам, — далучайцеся. Пра сваё жаданне арганізаваць і правесці экскурсію трэба паведаміць у аргкамітэт фэсту на электронны адрас fest@icomos.by — інфармацыя будзе апублікавана ў агульным спісе экскурсій на найбуйнейшых інтэрнэт-парталах і ў друкаваных СМІ.

***

“Раённыя будні” прапаноўваюць і свой варыянт удзелу ў акцыі. Давайце паспрабуем разам стварыць карту  і пракласці маршруты па малазнаёмых шырокаму колу месцах гістарычнай значнасці нашага рэгіёна. Дасылайце або паведамляйце нам па тэлефоне пра аб’екты, якія вы хацелі б бачыць на такім турыстычным маршруце. Дадавайце да назваў мясцін кароткі каментар, фотаздымак вітаецца!

Экспертам нашага новага праекту выступіць дырэктар музея-сядзібы “Пружанскі палацык” Юрый Зялевіч.

Кацярына Пашкевіч.