В Пружанах прошел парад Дедов Морозов и церемония награждения талантливых детей «Дарование-2012»

Хто сказаў, што адораных людзей ужо няма? Не верце! А пацвярджэннем таму — урачыстая цырымонія ўшанавання лепшых дзяцей раёна «Дарование-2012», якая адбылася ў мінулую нядзелю.

Старт мерапрыемства ўзяло ад музея-сядзібы «Пружанскі палацык». Варта адзначыць, што падобнае свята праходзіла ў нашым горадзе ўпершыню. Гэтак жа, як і прымеркаваны да яго парад Дзядоў Марозаў. На адной з галоўных вуліц горада пад гукі аркестра цікаўныя назіралі шэсце, якое ўзначальвалі юныя таленты, што сабраліся з розных куткоў раёна, і галоўныя навагоднія госці — Дзяды Марозы са Снягуркамі.

Нягледзячы на калючы мароз, гульнявая праграма, якая разгарнулася на гарадской плошчы, сабрала нямала дзятвы. Хлопчыкі і дзяўчынкі з задавальненнем вадзілі карагод вакол ёлкі, удзельнічалі ў забавах. Але кульмінацыя свята была наперадзе, на сцэне Палаца культуры…

Цырымонію адкрыў яе ініцыятар — старшыня райвыканкама М.М.Серкоў.

— У эпоху халодных войнаў кіраўнік адной з дзяржаў заўважыў, што куды больш важнейшыя за ракеты маленькія залатыя кружочкі, якія зарабляюць спартсмены, — пачаў сваю прамову Міхаіл Мікалаевіч. — Сапраўды, магутнасць і слава дзяржавы складваюцца не столькі з арміі, сколькі з адораных людзей…

Паколькі выхоўваць у сям’і таленавітае дзіця — вялікая адказнасць, то і віншавалі не толькі саміх віноўнікаў урачыстасці, але і іх бацькоў. Усяго на сцэну падняліся 61 хлопчык і дзяўчынка для ўзнагароджання ў трох намінацыях: за ўдзел у абласных, рэспубліканскіх і міжнародных конкурсах. Ганна Кічкайла і Георгій Казлоўскі, Марына Шурына і Паліна Субота, Павел Небыт і Вікторыя Ёрш, Антон Кусцінскі і Дзіяна Саўчук, Дзмітрый Кунда і Павел Стагніеў, Андрэй Куяўскі і Вікторыя Хмялеўская, а таксама многія-многія іншыя вылучыліся на алімпіядах, спартыўных спаборніцтвах, музычных і навуковых конкурсах. Асаблівы гонар за Набіля Зарука, Караліну Дыба, Юлію Рыпінскую, Анастасію Шайнюк, Дар’ю Казарэз, Івана Стэпуся і Наталлю Трус, якія здолелі вы-значыцца на міжнародных конкурсах. У якасці заахвочвання кожны атрымаў грашовую прэмію.

Бацькам юных талентаў уручылі падзякі. Апладысменты гучалі для педагогаў, якія дапамагалі сваім адораным вучням дасягнуць гэтых вяршынь.

Асобны падарунак — вялікі мех з цукеркамі — чакаў удзельнікаў народнай студыі моды «Папараць-кветка» — таксама дыпламантаў  конкурсаў рознага ўзроўню. Яны, дарэчы, прадэманстравалі адну са сваіх калекцый падчас канцэртнай праграмы.

Напрыканцы публіку чакала забаўляльная праграма ад Дзеда Мароза і Снягуркі з СШ №1 — удзельнікаў абласнога агляду-конкурсу «Ёлка-фэст». А завяршыла свята відовішчнае неонавае шоу.

…Зусім хутка адыдзе ў гісторыю 2012 год. А колькі дасягненняў ён прынёс Пружаншчыне! Застаецца спадзявацца, што 2013-ы будзе не менш шчодрым і на сцэну падчас наступнай цырымоніі «Дарование» (а яе паабяцалі зрабіць традыцыйнай) падымецца яшчэ большая колькасць юных талентаў, якія праславілі Пружаншчыну.

Марына Вакульская, Аляксандр Мелеш (фота).