Понедельник, 23 мая 2022

Чарвякоў: законапраект аб урэгуляванні неплацежаздольнасці нацэлены на захаванне вытворчасцей, бізнесу

88

Законапраект аб урэгуляванні неплацежаздольнасці — гэта ліквідацыя неэфектыўнасці і захаванне вытворчасцей і бізнесу. Аб гэтым заявіў 27 красавіка міністр эканомікі Аляксандр Чарвякоў, выступаючы з дакладам аб законапраекце аб урэгуляванні неплацежаздольнасці ў Палаце прадстаўнікоў, паведамілі БЕЛТА ў прэс-службе Мінэканомікі.

Паводле слоў Аляксандра Чарвякова, праект, улічваючы прынцыповыя заўвагі кіраўніка дзяржавы, прыводзіць у адпаведнасць з актуальнымі задачамі развіцця эканомікі механізмы папярэджання банкруцтва і дасудовага аздараўлення праблемных прадпрыемстваў, падставы для прызнання даўжніка неплацежаздольным, парадак вядзення судовай справы.

Міністр эканомікі пералічыў ключавыя блокі праекта дакумента, якія фарміруюць яго аснову. «Першае: у банкруцтва ў прынцыпе не трапляюць прадпрыемствы ВПК, энергетыкі, валаўтваральныя — як дзяржаўныя, так і прыватныя. Для гэтага ўраду дадзены паўнамоцтвы на зацвярджэнне пераліку такіх арганізацый», — сказаў ён.

Па-другое, удасканальваецца антыкрызіснае кіраванне ў дзяржсектары. «Мы пашыраем паўнамоцтвы дзяржорганаў. Выканкамам прадастаўляецца права арганізаваць папярэджанне банкруцтва прыватных прадпрыемстваў на сваёй тэрыторыі», — адзначыў Аляксандр Чарвякоў.

Па-трэцяе, узмацняецца абарона працоўных калектываў: іх прадстаўнік будзе абавязкова ўдзельнічаць у рабоце камітэта крэдытораў і бясспрэчнага спагнання пенсійных узносаў.

Чацвёрты блок — забяспечваецца двухэтапнасць фінансавага аздараўлення. «Для першага этапу замацоўваецца тэрмін санацыі прадпрыемстваў 36 месяцаў з магчымым прадаўжэннем на 24 месяцы, які супадае з гарызонтам сярэднетэрміновага бізнес-планавання. За гэты час можна мабілізаваць рэсурсы для аздараўлення, дысцыплінаваць усіх удзельнікаў санацыі, пазбавіцца ад «прывычкі» не плаціць па даўгах, — расказаў міністр. — Аднак некаторыя прадпрыемствы па аб’ектыўных прычынах не змогуць у названы тэрмін вярнуцца ў звычайныя рыначныя ўмовы гаспадарання. Для іх удасканальваецца працэдура міравога пагаднення з крэдыторамі аб адтэрміноўцы плацяжоў пасля санацыі, напрыклад, на тэрмін ад 3 да 10 гадоў, у якасці другога этапу аздараўлення».

Акрамя таго, праект забяспечвае баланс інтарэсаў праблемнага прадпрыемства і яго крэдытораў. «Не чакаючы надыходу крызісу, дырэктар, калі не можа паўгода разлічыцца з даўгамі, мае права першым ініцыяваць санацыю. А крэдытор — пасля заканчэння такога ж тэрміну прымусовага выканання падаць заяву ў суд», — паведаміў кіраўнік ведамства.

Замацоўваецца чарговасць размеркавання выручкі ад закладу. «У першую чаргу — зарплата і пенсійныя ўзносы. Затым — патрабаванні крэдытора, банка за вылікам 20 працэнтаў на карысць бюджэту і на судовыя расходы», — сказаў Аляксандр Чарвякоў.

Акрамя таго, ліквідацыя даўжнікоў без маёмасці, так званага кінутага бізнесу, будзе фінансавацца ініцыятарам банкруцтва. Пры гэтым знізіцца нагрузка на бюджэт, з якога цяпер аплачваюцца такія раходы.

Ад імя дзяржавы будзе выступаць адзіны крэдытор — падатковы орган, які акумулюе ўсе бюджэтныя патрабаванні.

Нарэшце, суд забяспечыць толькі адкрыццё і завяршэнне справы. «Астатнія рашэнні, звязаныя з суправаджэннем санацыі або ліквідацыі, будуць прымацца дзяржорганам і сходам крэдытораў», — адзначыў міністр.

Як падкрэсліў кіраўнік ведамства, асноўная задача заканадаўства аб урэгуляванні неплацежаздольнасці — захаванне бізнесу, яго аздараўленне, павышэнне эфектыўнасці. І толькі ў выключных выпадках, дзе немэтазгодна прадаўжаць дзейнасць з-за эканамічных прычын, — яго ліквідацыя, але з абавязковым кіруемым вызваленнем і прадастаўленнем рабочых месцаў.

«Сістэма заканадаўства будзе забяспечваць своечасовы зварот за санацыяй, адсякаючы спробы выкарыстоўваць працэдуры неплацежаздольнасці для перадзелу ўласнасці. Але асобныя прадпрыемствы, якія не маюць перспектыў аздараўлення і затраты на рэанімацыю якіх перавышаюць аддачу, будуць ліквідавацца без стварэння негатыўных сацыяльных наступстваў, як правіла, шляхам продажу інвестару маёмаснага комплексу. У эканамічным сэнсе гэта азначае ліквідацыю неэфектыўнасці з захаваннем вытворчасці і бізнесу», — рэзюмаваў Аляксандр Чарвякоў.

Па выніках разгляду праект закона «Аб урэгуляванні неплацежаздольнасці» прыняты дэпутатамі ў першым чытанні.

https://blr.belta.by/economics/view/charvjakou-zakonapraekt-ab-ureguljavanni-neplatsezhazdolnastsi-natseleny-na-zahavanne-vytvorchastsej-114107-2022/