Воскресенье, 22 мая 2022

Хочаце займацца ёгай? Тады вам у Шарашоўскі цэнтр культуры і вольнага часу!

709

Дзіўныя гукі на незразумелай мове за дзвярыма вялікай залы Шарашоўскага цэнтра культуры і вольнага часу падказваюць, што чарговы занятак ёгай ужо пачаўся. Двойчы на тыдзень тут збіраюцца тыя, хто разумее, што іх арганізм — вельмі мудрая і чулая субстанцыя, схільная, на жаль, да ўзроставых змен. Каб утрымаць гармонію паміж вечна маладой душой і целам, трэба шмат працаваць…

— А лепшым памочнікам у працы над гарманізацыяй унутраных працэсаў з’яўляецца ёга! — адказваюць жанчыны, з якімі мы паразмаўлялі пасля заняткаў.

Практыкуюць яны такую разнавіднасць усходніх практык, як Кундаліні ёга.

— Ёга паляпшае самаадчуванне, настрой, робіць цела больш рухомым. Гэта новая ступень свабоды, калі вы адчуваеце, што можаце зрабіць тое, што не рабілі нават у маладыя гады, — з усмешкай тлумачыць трэнер Аксана Пернач.

Пад яе кіраўніцтвам займаюцца жанчыны ад 30 да 60 гадоў. Некаторыя з іх першапачаткова ведалі, куды ідуць, а хтосьці пачаў займацца ёгай з-за цікавасці. І тыя, і другія, дзякуючы трэніроўкам, зараз ужо не ўяўляюць, як раней абыходзіліся без ёгі.

— Кожны занятак пачынаецца з таго, што мы стараемся супакоіць свой розум і цела, каб яно стала адкрытым для змен, спяваем мантру. Затым выконваем асаны, якія складаюцца з трох блокаў: размінкі, так званай крыі і медытацыі. Заключны этап — гэта поўнае расслабленне, адпачынак. Важным момантам у выкананні асан з’яўляецца правільнае дыханне і заплюшчаныя вочы, для больш поўнага паглыблення ў сябе. А яшчэ мы выкарыстоўваем спакойную музыку для максімальнай рэлаксацыі, — тлумачыць трэнер.

— Спачатку нам было цяжка паўтараць за Аксанай Іосіфаўнай, — прызнаюцца яе падапечныя, — але паступова целы сталі больш паслухмянымі. Больш за тое, мы заўважылі, што ёга дабратворна паўплывала на здароўе: пазбавіла ад прыступаў мігрэні, боляў у суставах. І, што немалаважна, пачала сыходзіць лішняя вага. Мы навучыліся пазбаўляцца ад пачуцця хранічнай стомленасці.

— Так, карысць ёгі неацэнная! — згаджаецца з жанчынамі Аксана Пернач. — Выкананне асан дабратворна ўплывае на гарманальны фон, работу ўнутраных органаў. Займаючыся, вы не толькі спыняеце час, але і паварочваеце яго назад. Аднак трэба разумець, што прынцып «не нашкодзь» застаецца ў сіле. Усе людзі розныя, з рознымі фізічнымі магчымасцямі. Не трэба імкнуцца выконваць асаны ідэальна, як мы часта бачым на карцінках. Трэба навучыцца адчуваць сваё цела. Тады яно само пачне падказваць, што яму трэба. У любым выпадку, ваша жыццё з ёгай ужо не будзе ранейшым.

Алена Зялевіч. Фота ўдзельнікаў секцыі па ёге