Понедельник, 23 мая 2022

Рэпартаж з рамонтных майстэрняў ААТ «Жураўлінае», дзе зараз рыхтуюць тэхніку да новага сезона

487

У ААТ “Жураўлінае” цудоўна разумеюць, што, каб у вызначаныя тэрміны правесці пасяўную кампанію, патрэбна грунтоўна падысці да падрыхтоўкі тэхнікі, якая будзе задзейнічана ў работах. Для прадпрыемства – гэта заклад будучага добрага ўраджаю, адпаведна – эканамічнай стабільнасці і ў нейкай ступені росту заработнай платы работнікаў сельгасарганізацыі. Таму стараюцца ўсе: і кіраўнікі розных звёнаў, і самі работнікі. У чым карэспандэнты ўпэўніліся падчас наведвання рамонтных майстэрняў ААТ “Жураўлінае” ў аг. Клепачы.

Галоўны інжынер Дзмітрый Жалнерка.

Галоўны інжынер прадпрыемства Дзмітрый Жалнерка расказаў, што ўся рамонтная кампанія праходзіць у тры этапы: на першым – аднаўленне тэхнікі вясенняга прызначэння: энерганасычаных трактароў, камбінаваных глебаапрацоўчых пасяўных агрэгатаў, плугоў і інш.; на другім – трэба прывесці ў поўную гатоўнасць тэхніку для нарыхтоўкі кармоў, кормаўборачныя камбайны, касілкі, граблі; на трэцім – агрэгаты для ўборкі збожжавых. На дадзены момант працэнт гатоўнасці складае не менш за 95 да запланаванага. Гэта гарант таго, што работы ў дадзеным напрамку ў сельгасарганізацыі будуць выкананы нават раней за намечаныя тэрміны.

Загадчык рамонтных майстэрняў Мікалай Макарэвіч разам з галоўным інжынерам Дзмітрыем Жалнеркам.

Загадчык рамонтных майстэрняў Мікалай Макарэвіч паведаміў, што ўсе вытворчыя памяшканні загадзя былі падрыхтаваны да таго, каб работнікам было камфортна працаваць (гаворка ідзе пра цэнтральнае ацяпленне). Ёсць і спецыяльны пакой для адпачынку, тут жа могуць вельмі смачна пакарміць, на тэрыторыі майстэрні маецца свая сталоўка. Належная ўвага падчас рамонту сельгастэхнікі надаецца і камплектацыі інструментамі, бо без гэтай акалічнасці складана правесці якасны рамонт і атрымаць станоўчы вынік. Устанаўленне дэфектаў дэталяў таксама знаходзіцца на належным узроўні, бо падчас правядзення пасяўной кампаніі непажадана, каб хоць адна адзінка тэхнікі выйшла са строю, — тут ужо час лічыцца не днямі, а гадзінамі.

Дом механізатара ААТ «Жураўлінае».

На пытанне, ці хапае запчастак для рамонту, Дзмітрый Жалнерка адказвае:

— Усё, што патрэбна для рамонту, закупляецца своечасова, таму з гэтай прычыны прастояў няма. Закуп запчастак адбываецца планава, для рамонту канкрэтнай тэхнікі. І робіцца гэта на пастаяннай аснове. Ды і на складзе маецца запас.

Гэта пацвярджае і механізатар Віктар Чопка, які адпрацаваў у гаспадарцы каля 20 гадоў. Ён займаецца рамонтам свайго энерганасычанага трактара “Беларус-3522”, які непасрэдна будзе задзейнічаны ў вясенніх палявых работах. Таму і адказнасць сваю Віктар Анатольевіч разумее.

Слесар Анатолій Матвяйчук.

Мікалай Макарэвіч звяртае нашу ўвагу на тое, што немалаважным фактарам з’яўляецца кваліфікацыя тых спецыялістаў, якія заняты на адпаведнай рабоце. І знаёміць нас з Анатоліем Матвейчуком, слесарам 6 разраду, які шчыруе на прадпрыемстве 30 гадоў. Анатолій Пятровіч рамантуе раскідвальнік мінеральных угнаенняў “РМУ-8000” і робіць гэта з веданнем справы. Між іншым, паведамляе, што не збаўляць тэмп рамонтных работ дапамагае такарны цэх, дзе таксама працуюць высокакваліфікаваныя работнікі.

Усе мы разумеем, што з цягам часу любая тэхніка зношваецца, нават пры добрым доглядзе. Таму, па словах галоўнага інжынера, на 2022 год запланавана абнаўленне парку тэхнікі. Ужо закуплены два камбайны, іх пастаўка чакаецца па працягу 2 месяцаў, набыты самаходныя кормараздатчыкі, пагрузчык “Амкадор”. У далейшым плануецца набыццё трактароў і іншай сельгастэхнікі.

Вадзім Раўнейка. Фота Кацярыны Масік