Четверг, 11 августа 2022

Наша апытанне з нагоды 50-гадовага юбілею фільма «Джэнтльмены ўдачы»: Добрае кіно з гадамі толькі лепшае?

692

Існуюць фільмы, якія глядзелі, мусіць, усе, ды не па адным разе. Менавіта такім з’яўляецца «Джэнтльмены ўдачы». Кінастужцы сёння, 13 снежня, спаўняецца ажно 50 гадоў. Пра ўражанні наконт юбілею фільма мы і спыталі сустрэчных пружанцаў, а таксама — хутка ж Дзень беларускага кіно — пацікавіліся, ці часта яны глядзяць фільмы ў кінатэатры.

Сяргей:

— Вядома ж, я глядзеў «Джэнтльмены ўдачы», гэта вельмі цікавы фільм. Наогул я люблю савецкае кіно. Адзін з любімых фільмаў — гэта «Іронія лёсу, або З лёгкай парай». Але ўсе фільмы гляджу дома, у кінатэатр хадзіў, калі быў малады. Цяпер часу зусім няма. Праца, праца.

Васіль Фёдаравіч:

— Першы раз паглядзеў гэты фільм паўстагоддзя таму, якраз тады, калі ён з’явіўся на экранах. І зараз, калі натыкнуся ў тэлевізары на «Джэнтльменаў удачы», то не пераключаю на іншы канал, гляджу да канца. У кінатэатр я не хаджу, бо ўвесь час чымсьці заняты. Ну, а калі юбілей у гэтага фільма, то значыць, ёсць нагода зноў перагледзець яго.

Людміла:

— Фільм гэты, вядома, я бачыла, але асабліва не памятаю. Мне больш падабаюцца іншыя стужкі, напрыклад, «Масква слязам не верыць», «Зімняя вішня». Гэта фільмы пра жыццё, пра каханне. Сучасныя фільмы не гляджу, мне яны не цікавыя. У кінатэатры даўно не была, а вось у маладосці любіла хадзіць і ў кіно, і ў тэатры, і ў музеі. Цяпер неяк больш дома…

Аляксандр:

— «Джэнтльменаў удачы» я глядзеў калісьці, але аддаю перавагу сучаснаму кіно. Люблю трылеры, фантастыку, хорар. А ў кінатэатры гляджу толькі мультфільмы з дзіцем.

Таццяна:

— Вядома, «Джэнтльменаў удачы» я глядзела. Але любімыя фільмы ў мяне іншыя: «Іронія лёсу, або З лёгкай парай» і «Белыя росы». Гэта фільмы жыццёвыя. А ў кінатэатры я хаджу, вельмі падабаецца. Нядаўна была ў брэсцкім. Мне здаецца, што цікавей глядзець фільм на вялікім экране, з сучаснай акустыкай, а яшчэ разам з дружнай кампаніяй і ў добрым настроі.

Кацярына:

— Фільм «Джэнтльмены ўдачы» глядзела, але адзін толькі раз. Увогуле мала атрымліваецца глядзець фільмаў, хіба толькі мульцікі з дзіцем. І ў кінатэатры была даўно, цяпер на гэта абсалютна няма часу.

Вось сапраўды, у тых, хто не глядзеў фільм, сёлета ёсць юбілейная нагода паглядзець яго, а ў тых, хто бачыў, — перагледзець. Добрае кіно, як і добрае віно, толькі лепей з гадамі.

Думкамі цікавілася Вольга Вадзяновіч. Фота Кацярыны Масік