Пятница, 23 октября 2020

Начальнік выпрабавальнай будаўнічай лабараторыі Дзмітрый Міхееў пра выбар прафесіі

237

Як шырокі кругагляд можа дапамагчы пры выбары будучай спецыяльнасці? На што звяртаць увагу пры падрыхтоўцы да паступлення? Чым займаюцца інжынеры-будаўнікі? Дзеліцца сваім вопытам і дае парады начальнік выпрабавальнай будаўнічай лабараторыі ДЭУ-25 Дзмітрый Міхееў.


—Як ты прыйшоў да выбару прафесіі?
— Як і многія сучасныя юнакі і дзяўчаты, зыходзячы з уласных здольнасцей. Дакладныя навукі даваліся мне куды лягчэй, чым гуманітарныя. Прафесійных дынастый у нашай сям’і няма, ніхто мяне да «сямейнай справы» не падштурхоўваў, таму быў поў-насцю вольны ў выбары. Наколькі памятаю, самастойна гартаў даведнікі абітурыента і параўноўваў прахадныя балы папярэдняга года са сваімі, атрыманымі на тэсціраванні. Спецыяльнасць інжынера-будаўніка здалася перспектыўнай, карыснай і цікавай.

—Як праходзіла падрыхтоўка да паступлення?
— Я вучыўся ў гімназіі г.Пружаны ў фізіка-матэматычным класе. У нас была выдатная настаўніца геаметрыі і алгебры Раіса Васільеўна Маркечка. Акрамя базавых школьных урокаў, наведваў факультатыў па матэматыцы. У сярэдзіне 2000-х рэпетытарства толькі набірала абароты, а бал атэстата не ўлічваўся. Тэсціраванне неабходна было прайсці па матэматыцы, фізіцы і рускай мове. Апошнія месяцы навучання ў 11 класе дадаткова для ўпэўненасці хадзіў да рэпетытара па мове. Для таго, каб зарабіць прахадныя балы, якія аказаліся вышэй за сярэднія сярод усіх інжынерных спецыяльнасцей у той уступнай кампаніі, такой падрыхтоўкі хапіла б. Дакументы падаваў у БНТУ г. Мінска, паступіў на бясплатнае навучанне.

—Ці складана было вучыцца?
— Вучыцца было, вядома, цікавей, чым у школе, асабліва з трэцяга курса, калі пачаліся профільныя прадметы. Тады ўжо фарміравалася яснасць у спецыфіцы будучай прафесіі, што дазваляла глядзець на працэс навучання з іншага боку. Калі канкрэтна ведаеш, з чым давя-дзецца працаваць, калі бачыш свае прабелы ў ведах, тады прасцей вучыцца, самастойна можна рухацца наперад. Але ў навучальным працэсе не хапала практыкі (як вядома, лепш адзін раз убачыць і паспрабаваць, чым некалькі разоў пачуць).
Акрамя вучобы ва ўніверсітэце, развівацца дапамагалі і зносіны, бо групы фарміраваліся з жыхароў розных гарадоў, а ў інтэрнатах пражывалі студэнты з розных факультэтаў, розных спецыяльнасцей. Да таго ж, у буйным горадзе, здаецца, няма межаў для развіцця: гэта і пад-працоўка, і дадатковая адукацыя, і КВЗ, і «Студэнцкая вясна», і больш варыянтаў баўлення часу.

—Што ўваходзіць у твае штодзённыя абавязкі?
— Ні для каго не сакрэт, што любая работа мае патрэбу ў кантролі якасці, асабліва ў будаўнічай сферы, дзе вынік залежыць ад шматлікіх фактараў і ўмоў, якія далёка не заўсёды з’яўляюцца ідэальнымі. Гэта і якасць сыравіны, і спраўная работа механізмаў, і чалавечы фактар, і ўмовы надвор’я, і г.д., што ў комплексе ўплывае на якасць гатовай прадукцыі. Ёсць такая прымаўка: «Дзе тонка — там і рвецца», гэта асабліва актуальна ў інжынернай справе і вытворчасці матэрыялаў, дзе які-небудзь нязначны нюанс можа змарнаваць намаганні многіх людзей, прывесці да выдаткаў рэсурсаў і страты часу.
Нягледзячы на тое, што, здавалася б, тэхналогіі і будаўнічыя матэрыялы практычна не мяняюцца, працуем з імі не адно дзесяцігоддзе і павінны былі быць адпрацаваны да аўтаматызму правілы і парадак работ, усё роўна неабходна быць напагатове і кантраляваць тэхналагічныя працэсы і якасць прадукцыі.
У мае штодзённыя абавязкі ўваходзяць лабараторны кантроль за якасцю дарожна-будаўнічых матэрыялаў, кантроль за выкананнем тэхналогіі іх перапрацоўкі, кантроль за якасцю гатовай прадукцыі (асфальтабетонныя сумесі, бітумная эмульсія, супрацьгалалёдныя матэрыялы, інертныя матэрыялы і сумесі і іншае), распрацоўка падбораў саставаў, работа над паляпшэннем тэхналогій вытворчасці. Зона дзейнасці — філіялы РУП «Брэстаўтадар», гэта значыць, арганізацыі, якія абслугоўваюць рэспубліканскія і магістральныя дарогі Брэсцкай вобласці.
Прафесія творчая і інтэлектуальная па большай частцы. Неабходна валодаць багажом ведаў у дарожна-будаўнічай сферы і арыентавацца ў дзяржаўных стандартах вытворчасці работ і якасці прадукцыі. У інжынернай справе заўсёды ёсць, да чаго імкнуцца і куды развівацца.
Работа наогул разнапланавая: тут хапае і папяровай працы, і фізічнага руху, і палявых работ, і зносін. У гэтым вялікі плюс для тых, хто не імкнецца ўвесь працоўны дзень праводзіць у офісным крэсле, гледзячы ў манітор і робячы аднатыпную работу.

—Каму б ты параіў абраць такую прафесію?
— Тым, хто хоча ствараць бачныя аб’екты, хто лічыць якасць прадукцыі не менш важным крытэрыем у вытворчасці прадукцыі і работ, чым яе колькасць.
Пашырайце кругагляд: па-спрабуйце разабрацца ў кодзе вэб-старонкі, у мікрасхемах электронных плат, у падатковай сістэме, пры магчымасці па-спрабуйце сябе ў кіраванні трактарам або грузавіком, прыгатуйце самастойна боршч, папрактыкуйцеся ў нанясенні тынкоўкі, рабоце са зварачным апаратам, чытайце літаратуру розных жанраў, вучыце замежныя мовы і не бойцеся спрабаваць сябе ў незнаёмых галінах дзейнасці — гэта значна спросціць пошукі сябе.
Гутарыла Кацярына Пашкевіч.