Понедельник, 21 сентября 2020

Анатоль Васерман: «Арганізатарам пратэстаў у Беларусі, як і Саахаву з «Каўказскай нявольніцы», пара да пракурора»

97

Беларусь з’яўляецца адной з самых эканамічна стабільных краін рэгіёна, і менавіта гэты дабрабыт забяспечвае ўладзе падтрымку з боку народа. Такое меркаванне выказаў у размове з карэспандэнтам БЕЛТА вядомы інтэлектуал і публіцыст Анатоль Васерман.

«Беларусь — адна з даволі эканамічна стабільных рэспублік былога СССР, — канстатаваў Анатоль Васерман. — Скажам, калі Украіна да «аранжавай рэвалюцыі» мела валавы ўнутраны прадукт у разліку на душу насельніцтва крыху вышэйшы, чым Беларусь, то цяпер гэты паказчык удвая горшы, чым у Беларусі. У прыбалтыйскіх краінах валавы ўнутраны прадукт фармальна вышэйшы, але на самай справе гэта сума складалася спачатку з продажу ўсяго атрыманага ў спадчыну ад савецкіх часоў, а цяпер яны жывуць проста на датацыях з бюджэту Еўрапейскага саюза, якія ім даюцца даволі шчодра менавіта для таго, каб яны выглядалі прынадай для Беларусі, Калінінградскай вобласці Расіі і г.д. Але фактычна, калі глядзець па рэальнай вытворчасці, Беларусь адна з самых стабільных краін рэгіёна. Па рэальнай вытворчасці на душу насельніцтва яна ўступае толькі Расіі, і тое ненамнога. І калі адкінуць усялякія фінансавыя гульні і іншы гандаль паветрам, то розніца невялікая».

Публіцыст упэўнены, што заклікі да забастовак не знайшлі масавай падтрымкі ў Беларусі менавіта з-за эканамічнай сітуацыі ў краіне. «Ёсць такое агульнае правіла ў палітыцы: да таго часу, пакуль народ бачыць, што жыве больш-менш стабільна, прынамсі, лепш за суседзяў, ён галасуе за дзеючую ўладу, — адзначыў ён. — А народ Беларусі гэта бачыць дакладна, таму што Смаленская вобласць Расіі, якая мяжуе непасрэдна з Беларуссю, — адна з дэпрэсіўных. Гэта значыць, яна выпрацоўвае значна менш за сярэдні па Расіі ўзровень і з’яўляецца вельмі наглядным прыкладам».

Анатоль Васерман падкрэсліў, што апазіцыя ў Беларусі спрабуе выкарыстоўваць любыя метады: масавыя беспарадкі, забастоўкі — што заўгодна. «Гэтыя людзі ўжо занадта ўлезлі ў масавыя беспарадкі, яны разумеюць, што значную іх частку чакаюць суд і сур’ёзны тэрмін, і таму яны могуць толькі ўслед за таварышам Саахавым з «Каўказскай нявольніцы» паўтарыць: «Або я вяду яе ў загс, або яна мяне — да пракурора». Але, наколькі я магу меркаваць, пры першых жа прыкметах таго, што Аляксандр Лукашэнка можа сабраць мітынгі больш масавыя, чым апазіцыя, яна пачала знікаць. Прыкладна гэтак жа было ў Расіі на мяжы 2011-2012 гадоў».

Анатоль Васерман заўважыў, што тэхналогія масавых беспарадкаў пры каляровых рэвалюцыях у многіх краінах адпрацавана такім чынам, каб вымушаць праваахоўнікаў затрымліваць вялікую колькасць зусім невінаватых людзей. «Калі які-небудзь адмарозак забягае за натоўп разявак і з гэтага натоўпу кідае бутэлькі з бензінам, то пры яго затрыманні непазбежна затрымаюць яшчэ дзясятак-другі людзей, якія не паспелі расступіцца перад міліцыяй, — растлумачыў ён. — Але з гэтым хутка разбіраюцца, і, наколькі я ведаю, цяпер у Беларусі вызвалены практычна ўсе затрыманыя такім чынам».

Паводле слоў Анатоля Васермана, арганізатары масавых беспарадкаў у Беларусі пачалі прымяняць метадычку па правядзенні каляровай рэвалюцыі з канца. «Яны пачалі з сілавых непарадкаў, кіданняў кактэйляў Молатава, наездаў аўтамабіляў на міліцыянераў, — нагадаў ён. — І адразу ж паказалі тое, што яны рыхтуюць краіне, настолькі пераканаўча, што калі абдумаліся і пачалі прымяняць першыя старонкі метадычкі, ім ужо сталі менш верыць. Наколькі я ведаю, некаторая частка тых, хто быў супраць Лукашэнкі, вырашыла, што гэтыя (апазіцыя. — Заўвага БЕЛТА) яшчэ горшыя».

«Гэта ўсё часткі вядомай, падрабязна задакументаванай і нават апублікаванай для ўсеагульнага ведама тэхналогіі так званай метадычкі Шарпа. І ўсё, што цяпер адбываецца ў Беларусі, робіцца па гэтай метадычцы», — сказаў на заканчэнне Анатоль Васерман.