Суббота, 26 сентября 2020

Пружанские медики благодарны всем, кто сейчас оказывает им помощь

1 220

Сёння галоўнымі героямі “каранавіруснага фронту” з’яўляюцца медыцынскія работнікі — урачы, фельчары, медсёстры, санітары. Ад іх прафесіяналізму, самаахвярнасці і, не ў апошнюю чаргу, здароўя залежыць зыход бітвы. Выстаяць медыкі — выстаяць і пацыенты.


— Поўная экіпіроўка персаналу — наша задача нумар адзін. Таму хочацца выказаць словы ўдзячнасці ўсім неабыякавым людзям, якія ўнеслі сваю пасільную лепту ў справу забеспячэння сродкамі індывідуальнай абароны і неабходнай апаратурай устаноў аховы здароўя раёна, — адзначае галоўны ўрач Пружанскай ЦРБ В.М. Дараневіч.


Ад многіх арганізацый, працоўных калектываў, юрыдычных і прыватных асоб раёна ў якасці спонсарскай дапамогі на рахунак бальніцы было пералічана ў агульнай складанасці 204 335 рублёў. Значны ўклад — па 20 000 руб. — унесла пяць гаспадарак: гэта ААТ «Велікасельскае Агра», «Агра-Калядзічы», «Ружаны-Агра», «Жураўлінае», а таксама Пружанскі льнозавод. 2000 рублёў ахвяравала фермерская гаспадарка «Бардо».


— У пляядзе мецэнатаў хацелася б адзначыць таксама кіраўніцтва Пружанскага малочнага камбіната, якое выдзеліла 61535 рублёў на пакупку кіслароднага канцэнтратара, і ТАА “ЕўраФармІнтэграцыя” за аналагічную падтрымку: закуплены фірмай канцэнтратар ужо функцыянуе ў інфекцыйным аддзяленні раённай бальніцы, — кажа Віктар Міхайлавіч.


Актыўны ўдзел у аказанні медыкам спонсарскай дапамогі прынялі таксама абласное аб’яднанне арганізацый прафсаюзаў і пярвічныя прафсаюзныя арганізацыі раёна, у прыватнасці, 20000 руб. пералічыў прафсаюз ААТ «Шані-аграпрадукт», 15000 руб. паступіла ад пярвічкі ААТ «Мурава».


З сабранай сумы на сённяшні дзень ужо асвоена каля 98738 руб. У прыватнасці, на спонсарскія грашовыя сродкі закуплена 200 ахоўных камбінезонаў, больш за 10000 ахоўных масак, 19000 пар пальчатак, 200 хірургічных халатаў, 500 дыхальных фільтраў, 5 рэцыркулятараў паветра, больш за 600 літраў дэзынфіцыруючых сродкаў і антысептыкаў, адзін фібрабранхаскоп, 24 бакі для дэзынфекцыі і іншыя неабходныя рэчы.


Сродкі, што засталіся, а гэта 105596 руб., будуць асвоены на працягу бліжэйшых двух тыдняў.
— Бязвыплатную дапамогу нашай бальніцы ў выглядзе неабходных рэчаў на суму 63201 руб. аказаў шэраг прыватных прадпрыемстваў. ТАА «ЕўраФармІнтэграцыя», ПП “Экалеспрадукт” і мінскі індывідуальны прадпрымальнік Ткачоў. У прыватнасці, яны перадалі 8 увільгатняльнікаў кіслароду, 400 медыцынскіх пальчатак, па 1000 аднаразовых нарукаўнікаў і аднаразовых капялюшыкаў, — адзначыў галоўны ўрач.

Жадаючыя дапамагчы раённым установам аховы здароўя па нумары 2-06-28 могуць звязацца з юрыстам Пружанскай ЦРБ Святланай Уладзіміраўнай Масяйчук. Юрыст падкажа, як правільна заключыць дамову і пералічыць дапамогу на рахунак. Яна ж дасць поўную справаздачнасць аб выкарыстанні спонсарскіх грошай.

Рэквізіты для пералічэння спонсарскай дапамогі
УАЗ «Пружанская цэнтральная раённая бальніца»
р/р BY АКВВ 3632 0000 0000 4110 0000
у ЦБУ № 122 філіяла № 113 ААТ «ААБ Беларусбанк» г.Кобрын,
БІК АКВВВY21113, УНП 200140287,
АКПА 02017401

Падрыхтавала Алена Зялевіч.