Четверг, 26 ноября 2020

Пружанские педагоги поделились своим опытом с коллегами со всей области

1 301

20 лютага на базе ДУА “СШ №1 г. Пружаны імя ЧБВА” прайшла абласная панарама эфектыўнага вопыту ў адукацыі Берасцейшчыны на прыкладзе сістэмы адукацыі Пружанскага раёна.


У гэты дзень менавіта пружанскім педагогам выпаў гонар падзяліцца сваім вопытам з калегамі з усёй вобласці. Мы не першыя, хто прыняў эстафету панарамы, падобныя мерапрыемствы ўжо прайшлі ў Кобрыне і Баранавічах. Таму нашым настаўнікам неабходна было паказаць высокі ўзровень.


Тое, што Пружаншчыне ёсць чым пахваліцца, было бачна ўжо ў фае школы, дзе былі прадстаўлены шматлікія выставы.

СШ №3 і Ружанская СШ прадэманстравалі калегам спартыўныя ўзнагароды, а іх, паверце, было мноства. Шаняўская СШ імя Міколы Засіма, зразумела, стаўку зрабіла на знакамітага земляка, біяграфія якога стала цэнтральнай постаццю іх прэзентацыі. Цэнтр творчасці дзяцей і моладзі паказаў свае дасягненні ў робататэхніцы. Гаспадары – СШ №1—здзівілі мастацтвам карвінгу.

Газетнай плошчы не хопіць, каб пералічыць усе выставы, дададзім толькі, што ўсё праходзіла пад музыкальнае суправаджэнне ўзорнага аркестра народных інструментаў “Скамарошына” дзіцячай школы мастацтваў імя Рыгора Шырмы.


Урачыстае адкрыццё адбылося ў актавай зале. Вядучымі мерапрыемства выступілі загадчыца сектара вучэбна-выхаваўчай работы аддзела па адукацыі Юлія Пасько і дырэктар Мокраўскай школы Алег Бзот. Адметна, што напярэдадні Міжнароднага дня роднай мовы ўсё мерапрыемства прайшло на беларускай мове. Да таго ж, першы прарэктар Брэсцкага абласнога інстытута развіцця адукацыі Станіслаў Рачэўскі падкрэсліў, што гэты год з’яўляецца юбілейным – у лістападзе мы адзначым 90-годдзе са дня нараджэння пісьменніка Уладзіміра Караткевіча. А гэта значыць, самы час “зазірнуць за плот у суседа і паглядзець, якія ж там каласы”. Намеснік старшыні райвыканкама Руслан Супрыновіч падчас свайго прывітальнага слова падкрэсліў, што гэта выдатна, калі калегі сустракаюцца для таго, каб падзяліцца сваім вопытам, а вышэйстаячыя органы ў першую чаргу дапамагаюць, а не кантралююць. На правах гаспадыні выступіла начальнік аддзела па адукацыі райвыканкама Ірына Казарэз. Спадзяванні Ірыны Анатольеўны на тое, што атрымаецца канструктыўная дыскусія, у поўнай меры спраўдзіліся.

У секцыі педагогаў-псіхолагаў вопытам дзеляцца Вольга Грышкевіч, Наталля Шчаглова, Вольга Цёхан, Вольга Цабрук, і Аксана Кот.


Пасля афіцыйнага адкрыцця пачалося самае цікавае: ад тэорыі перайшлі да практыкі. Пружанскія педагогі паказалі майстар-класы па самых разнастайных накірунках дзейнасці. Асобная секцыя для педагогаў-дэфектолагаў размясцілася на першым паверсе. Пад кіраўніцтвам мясцовых спецыялістаў госці пазнаёміліся з выкарыстаннем ЛЕГО-тэхналогій, пагулялі ў гульні і нават патанцавалі.

Педагог-псіхолаг ДУА «Яслі-сад №3» Вольга Грышкевіч праводзіць майстар-клас.


Загадчыкі вучэбна-метадычных кабінетаў сабраліся на другім паверсе. У іх праграме значыўся і майстар-клас па STEM-адукацыі, семінар па інклюзіі, трэнінг па правядзенні аналізу і сама-аналізу ўрока.

Адкрыты ўрок па рускай мове ў 5 класе правяла настаўніца СШ №1 Іна Якімавец.


Асобныя секцыі працавалі для намеснікаў дырэктараў па вучэбнай і выхаваўчай рабоце, намеснікаў загадчыкаў устаноў дашкольнай і дадатковай адукацыі. Па ўсіх накірунках пружанскія спецыялісты паказалі сапраўднае майстэрства.

Коучынг-сесію праводзіць настаўнік-дэфектолаг Параслянскай СШ Вольга Служанікіна.

Нават з назваў трэнінгаў бачна, што яны ідуць у нагу з часам, толькі ўслухайцеся: “Нейраграфія як форма эмацыянальнага ўзнаўлення педагогаў”, “Выкарыстанне QR-кодаў як элемента ўкаранення мабільных прылад у сучасным адукацыйным працэсе”, “Нейраграфіка. Мандалы развіцця”.


Адбылося падвядзенне вынікаў — і Пружанскі раён перадаў эстафету панарамы калегам з Жабінкі. А гэта значыць, што настаўнікі працягнуць папаўняць свае веды, каб зрабіць адукацыйны працэс больш простым і цікавым.

Кацярына Пашкевіч, Сяргей Талашкевіч (фота).