Понедельник, 22 октября 2018

В выходные Пружанщина принимала два фестиваля

1 510

На мінулых выхадных Пружаншчына гасцінна сустракала гасцей,  людзей творчасці: на працягу двух дзён у нашым раёне праходзіў заключны этап абласнога фестывалю вакальна-харавога мастацтва «Ляці, наша песня» і свята духоўнай музыкі «Песнь песняў».Фестываль, без перабольшвання, справядліва заняў сваё месца менавіта на пружанскай зямлі: тут нарадзілася і працавала нямала дзеячаў культуры і мастацтва, прозвішчы якіх вядомы далёка за межамі краіны, — Францішак Карпінскі, Юзаф Крашэўскі, Міхал Баброўскі, Мікола Засім, Міхась Забэйда-Суміцкі, Іван Хвораст… Сярод гэтай пляяды па-сапраўднаму таленавітых людзей і Рыгор Шырма, імя якога носіць дзіцячая школа мастацтваў у горадзе. І зусім невыпадкова святочнаму шэсцю калектываў-удзельнікаў фестывалю папярэднічала ўскладанне кветак да бюста нашаму знакамітаму земляку.

Урачыстае адкрыццё фестывалю адбылося каля музея-сядзібы «Пружанскі палацык». «Нам вельмі прыемна, што такое маштабнае культурнае свята прызямлілася ў нашым горадзе», — адзначыў намеснік старшыні райвыканкама М.П.Кудравец.
Блаславіў удзельнікаў перад выступленнямі настаяцель Свята-Аляксандра-Неўскага сабора. Айцец Міхаіл Носка ў сваёй прамове заўважыў: «Творчасць тады з’яўляецца паўнавартаснай, калі заклікае людзей да вышэйшых каштоўнасцей — дабра і справядлівасці. І вельмі сімвалічна, што конкурс духоўнай музыкі называецца «Песнь песняў», як адна з кніг Ветхага запавету, якую можна прыраўняць да творчага гімна». Ад упраўлення культуры Брэсцкага аблвыканкама вітала канкурсантаў першы намеснік начальніка ўпраўлення і старшыня арганізацыйнага камітэта фестывалю Т.І.Паўлюковіч.
Ганаровае права падняць сцяг фестывалю прадаставілі ўдзельнікам дзіцячага хору «Пралесак» школы педпрактыкі музычнага вучылішча Ровенскага дзяржаўнага гуманітарнага ўніверсітэта Назару Анішчуку і Дзіяне Яшчук, узорнага хору хлопчыкаў «Пеўнікі» Брэсцкага гарадскога Дома культуры Ільі Учаеву, узорнага хору «Ветразь надзей» Бярозаўскай дзіцячай школы мастацтваў Ганне Кайровіч, вакальнага квартэта «Камертон» Мозырскага Палаца культуры Ліліі Мартынюк, народнага акадэмічнага хору Ляхавіцкага Дома культуры Уладзіміру Сцекуцю.
Варта адзначыць, што за гады існавання фестываль займеў сваю адметную гісторыю, сфарміраваў цікавыя традыцыі, набыў шматлікіх прыхільнікаў, стаў адметнай з’явай у культурным жыцці Брэстчыны. Сёлета разам з пастаяннымі ўдзельнікамі з нашай вобласці — вядучымі калектывамі вакальна-харавога мастацтва — прымалі ўдзел у конкурснай праграме і госці з Украіны. Увогуле фестываль сабраў каля 600 удзельнікаў, 16 калектываў прадстаўлялі сваё майстэрства, восем з якіх — дзіцячыя. Усе гэтыя творчыя людзі прынеслі сапраўднае свята не толькі ў Пружаны. Таму што геаграфія сёлетняга фестывалю не абмежавалася гарадскім Палацам культуры: песні гучалі таксама на канцэртных пляцоўках у аграгардках — Клепачах, Мокрым, Лінове, Шарашове — і праваслаўных храмах раёна.
За два фестывальныя дні атрымалі прыемныя ўражанні ад сустрэч не толькі гледачы і аматары харавой творчасці. Самыя цёплыя ўспаміны пра фестываль засталіся і ў яго ўдзельнікаў. «Прыемна, што столькі людзей займаецца вакальным мастацтвам і робіць гэта з такой аддачай, — прызналася ў гутарцы з карэспандэнтам мастацкі кіраўнік калектыву «Пралесак» з украінскага Роўна Галіна Рабаконь. — Але мы засталіся пад уражаннем не толькі ад выступленняў калектываў, якія нічым не саступаюць лепшым еўрапейскім узорам, але, прызнацца шчыра, і вашым горадам — прыгожым, утыльным, чыстым, дзе пабывалі ўпершыню».
На сцэнічнай пляцоўцы каля Пружанскага палацыка адбылося закрыццё фестывалю і ўзнагароджанне пераможцаў. Абодва дыпломы лаўрэатаў фестывалю як сярод дзіцячых, так і дарослых калектываў  дасталіся прадстаўнікам Брэсцкага гарадскога Дома культуры — узорнаму хору хлопчыкаў «Пеўнікі» і народнай харавой капэле настаўнікаў.
Не засталіся без узнагарод і гаспадары. Па выніках конкурсу сярод дарослых калектываў дыпломам ІІ ступені быў узнагароджаны народны камерны хор Палаца культуры, якім кіруе Якаў Малайчук. Узорны хор дзіцячай школы мастацтваў імя Р.Шырмы (мастацкі кіраўнік Ірына Буланько) атрымаў таксама дыплом ІІ ступені ў намінацыі сярод дзіцячых калектываў.
Галоўны вынік, да якога прыйшлі арганізатары свята, — маладое пакаленне дастойна пераняць эстафету ад людзей, якія даўно звязалі сваё жыццё з песеннай творчасцю і культурай.
Марына Вакульская, Аляксандр Мелеш (фота).

Добавить комментарий

Ваш e-mail не будет опубликован. Обязательные поля помечены *