Среда, 11 декабря 2019

Сквер семейных пар пополнился красными дубами

834

Сквер сямейных пар, які быў закладзены сёлетняй вясной уздоўж ракі Мухавец, восенню папоўніўся новымі дрэвамі.


Яшчэ сем сем’яў далучылася да акцыі, ініцыяванай РК БРСМ і раённай інспекцыяй прыродных рэсурсаў і аховы навакольнага асяроддзя. Дапамогу ў правядзенні яе таксама аказалі работнікі лясгаса і камунальнай службы.


Многія маладыя пары прыйшлі разам з дзецьмі, а для некага пасадка дрэва стане першым выкананым пунктам з вядомай тройкі абавязкаў (дрэва-дом-сын). Ля кожнага дрэўца прымацавана шыльдачка з прозвішчам тых, хто яго пасадзіў. Гэта абавязвае да дадатковай адказнасці, бо проста пасадзіць дрэва – мала, трэба яшчэ забяспечыць належны догляд.


Цяпер побач з маладзенькімі клёнамі будуць красавацца і чырвоныя дубкі. Але свабоднага месца тут яшчэ хапае, а гэта значыць, што наступнай вясной новыя сем’і далучацца да акцыі.

Кацярына Пашкевіч, Сяргей Талашкевіч (фота).