Понедельник, 23 сентября 2019

Гісторыя з фатаграфіяй. Фэсты на «пляцы»

300

За «польскім часам» незабудаваны вялікі пляц на выездзе з горада выкарыстоўваўся для правядзення масавых мерапрыемстваў.

Як узгадвае ў сваіх успамінах ураджэнец Пружан Анджэй Свяньціньскі, падчас розных святкаванняў вайскоўцы (а размяшчаліся ў нашым горадзе часці лёгкай артылерыі і 25-ы полк уланаў вялікапольскіх) наладжвалі паказальныя выступленні коннікаў, спаборніцтвы па валоданні шабляй і кап‘ём. Сродкі, сабраныя падчас бяспройгрышных латарэй, якія традыцыйна разыгрываліся ў святочныя дні, ішлі на дабрачыннасць.

«Акрамя парадаў, конкурсаў, вайсковых выступленняў, спяваў хор, ігралі аркестры, праводзілі фестываль. Фестывальныя дзеі наладжваліся па вуліцы   3 Мая. Бацька аддаў мяне пад  апеку нашага засімавіцкага каваля Сяргея Ракіцкага. У латарэю мы выйгралі парася, якое выменялі на стрэльбішчы на магчымасць пастраляць для Сяргея, а мне дасталіся ласункі, сярод якіх вялізная цукровая вата на палачцы»…

Аўтар апісвае першую палову 1930-х гадоў, а фота, якое мы сёння змяшчаем, зроблена ў 1938-м, падчас правядзення свята песні. Паводдаль бачна тое самае «стрэльбішча», або цір.

Пасля вайны былая вуліца 3 Мая пачала называцца Чырвонаармей-скай. На месцы «пляца» да 1966 года размяшчаўся гарадскі стадыён, цяпер тут – Пружанскі завод радыёдэталяў.

Ірына СЯДОВА.

Фота з архіва А.М.Куроўскай.

Шаноўныя чытачы, калі ў вас ёсць свае «гісторыі з фатаграфіямі», дасылайце іх на электронны адрас RRBud2@brest.by  або тэлефануйце нам па нумарах: 9-12-36, 9-15-02.