Воскресенье, 20 мая 2018

Уроженка Ружан Юлия Гугельчук создает уникальные вещи и даже вышивала платье для участницы конкурса «Miss International»

1 047

Калі гаворка ідзе пра вышыўку, большасць уяўляе перад сабой рукатворныя ручнікі ды навалочкі (у лепшым выпадку — карціны), якія яшчэ пару дзясяткаў гадоў таму стварала кожная ўвішная гаспадыня. Са з’яўленнем разнастайных матэрыялаў для дэкаратыўнай творчасці ў такога віду рукадзелля, як вышыўка, з’явілася многа перспектыў. Маладая вышывальшчыца Юлія Гугельчук, ураджэнка Ружан, ведае, як стварыць непаўторную прыгажосць з дапамогай шклярусу, бісеру, карункаў і іншых матэрыялаў.
— Мама сцвярджае, што непадробны інтарэс да рукадзелля быў у мяне з дзяцінства, — усміхаецца дзяўчына. — Я парвала ёй не адны пацеркі, распарола не адну рэч з вышыўкай, а парчовую кофтачку раскроіла на сумачку.
Праўда, пакуль талент сфарміраваўся, прайшло нямала часу. Пасля заканчэння школы Юлія вырашыла стаць цырульнікам ды, магчыма, так і рабіла б прычоскі, калі б у адзін цудоўны дзень, знаходзячыся ў адпачынку па доглядзе за дзіцём, не вырашыла штосьці памяняць у жыцці. Усё пачалося з вышывання жаночых сумачак. Праўда, першапачаткова Юлія нават саромелася сваіх работ: проста сціпла дарыла іх родным і сяброўкам.
— Шчыра кажучы, не ўсім нават прызнавалася, што гэта маіх рук справа, — расказвае майстрыха. — Нават працадаўца, аднойчы ўбачыўшы ў мяне сумачку ручной работы, не адразу даведалася, хто на самай справе аўтар.
Сёння Юліна вышыўка ўпрыгожвае сукенкі студыі вясельнай і вячэрняй моды «Le Rina» (да слова, яе прадстаўніцтвы працуюць у Германіі і Літве) і сталічных фотастудый. Фінальны штрых вышывальшчыца надавала і ўборам мадэляў Нацыянальнай школы прыгажосці, у тым ліку ўдзельніцы конкурсу «Міс Беларусь», якая прадстаўляла краіну на конкурсе «Miss International».
А нядаўна сын з мужам выдзелілі ў двухпакаёвай кватэры сваёй любімай рамесніцы куточак для майстэрні: пару гадоў таму Юля Гугельчук узялася яшчэ і за выраб жаночых аксесуараў. Біжутэрыя ручной работы гэтай майстрыхі настолькі палюбілася модніцам, што цяпер Юля не паспявае выканаць адзін заказ, як ужо атрымлівае наступны.
— Многія з тых, хто ўжо меў са мной справу, вяртаюцца, каб заказаць арыгінальны падарунак для сваіх сяброў і знаёмых. Прызнаюся, вельмі прыемна, што мае работы разлятаюцца не толькі па бліжнім замежжы, але і трапляюць на іншы канец свету: у Амерыку, на Коста-Рыку…
Апошнім часам як рамесніца Юля пачала прадстаўляць свае работы на кірмашах у Брэсце, сочыць яна за моднымі тэндэнцыямі, наведваючы выставы і ў сталіцы. Дарэчы, спыняцца на дасягнутым Юля не збіраецца: плануе асвоіць люневільскую вышыўку — старадаўняе французскае мастацтва, якое ўжо дзясяткі гадоў не губляе папулярнасці.
— Для мяне немалаважна, што мае работы любяць, цэняць і, вядома ж, носяць. Гэта надае яшчэ большае натхненне, каб ствараць штосьці новае.
Марына Вакульская, фота аўтара.

2 комментариев

Добавить комментарий

Ваш e-mail не будет опубликован. Обязательные поля помечены *