Среда, 21 февраля 2018

Председатель Великосельского сельисполкома Татьяна Новицкая: «Услышать каждого человека»

255

Інтэрв’ю са старшынёй Велікасельскага сельвыканкама Т.М.Навіцкай.

— Таццяна Мікалаеўна, з якімі пытаннямі часцей за ўсё жыхары звяртаюцца ў сельвыканкам?
— Людзі прыходзяць у сельвыканкам з самымі што ні ёсць жыццёвымі праблемамі. На першы план выходзяць пытанні добраўпарадкавання населеных пунктаў, у прыватнасці, рамонт дарог, работа вулічнага асвятлення, спілаванне аварыйных дрэў. Рамонт вуліц найбольш актуальным з’яўляецца для аграгарадка Стараволя. Патрабуе вырашэння пытанне па стварэнні веласіпеднай дарожкі ад Стараволі да вёскі Засімавічы.
— А якая работа праводзіцца з пустуючымі і старымі дамамі?
— Работа па зносе пустуючых і старых дамоў вялася на працягу ўсяго мінулага года. Нам удалося летась знесці шэсць такіх дамоў, на што было выдаткавана 1100 рублёў бюджэтных сродкаў.
Вялікую дапамогу ў выкананні тэхнічнай часткі работы нам аказвае ААТ «Велікасельскае Агра». Зямельныя ўчасткі, якія вызваліліся пасля зносу дамоў, выкарыстоўваюцца пад новую забудову або ўводзяцца ў палі севазвароту.
У бягучым годзе, дарэчы, мы плануем знесці 8 безгаспадарных дамоў.
— Таццяна Мікалаеўна, а як забяспечваецца занятасць насельніцтва сельсавета?
— Афіцыйна беспрацоўнымі ў нас лічацца 11 чалавек. Тут неабходна адзначыць, што працоўныя месцы ў нас ёсць. На жаль, некаторыя грамадзяне не працуюць ужо на працягу многіх гадоў. З кожным з такіх жыхароў, якія ў нас знаходзяцца пад кантролем, праводзіліся неаднаразовыя гутаркі з дамашнім наведваннем.
Сёлета, як і летась, для беспрацоўных грамадзян плануем правесці кірмаш вакансій.
— У вас на тэрыторыі знаходзіцца некалькі аддаленых маланаселеных вёсак. Ці не адчуваюць іх жыхары сябе адзінокімі?
— Такія вёскі мы не забываем і наведваемся туды рэгулярна. Таксама ў гэтыя населеныя пункты прыяз-джае 2-3 разы на тыдзень аўталаўка, якая дастаўляе прадукты харчавання. Жыхары аддаленых вёсак замацаваны за фельчарска-акушэрскімі пунктамі, таму атрымліваюць неабходную медыцынскую дапамогу. Тут у цёмны час сутак уключаецца вулічнае асвятленне, стараемся падтрымліваць у належным стане вуліцы і пад’язныя дарогі.
— Таццяна Мікалаеўна, наперадзе важная палітычная падзея — выбары дэпутатаў мясцовых Саветаў. Наколькі Вы ўжо падрыхтаваліся да іх?
— Падрыхтоўка да выбараў дэпутатаў мясцовых Саветаў выходзіць на фінішную прамую. У нас створаны два выбарчыя ўчасткі і ўтвораны дзве ўчастковыя камісіі ў аграгарадках Стараволя і Вялікае Сяло. Удакладняюцца спісы выбаршчыкаў. Сельская выбарчая камісія зарэгістравала 11 кандыдатаў у дэпутаты сельскага Савета, прычым тры з іх не з’яўля-ліся дэпутатамі сельскага Савета цяперашняга склікання.
— Што Вас хвалюе больш за ўсё як кіраўніка мясцовага органа ўлады?
— Турбуе не зусім спрыяльная дэмаграфічная сітуацыя. На жаль, з кожным годам колькасць насельніцтва сельсавета змяншаецца. Па гэтай прычыне становіцца менш і вучняў у школах. Хацелася б, каб больш моладзі заставалася ў вёсках і нараджалася больш дзяцей.
Шмат клопату асабліва ў летні перыяд дастаўляюць нам пустуючыя дамы. Добра было б, каб спадчыннікі або ўладальнікі самі паклапаціліся аб навядзенні парадку вакол сваіх домаўладанняў.
Мікола Архуцік.

Добавить комментарий

Ваш e-mail не будет опубликован. Обязательные поля помечены *