Понедельник, 15 октября 2018

В рамках новогодней акции «Наши дети» руководство района поздравило ребят из детского дома семейного типа в Ружанах

597

Паказаць дзецям, што яны зусім не кінутыя і камусьці патрэбныя, — галоўная мэта святочнай акцыі, якая вось ужо каторы год праходзіць пад патранатам Прэзідэнта Беларусі. Калі дакладней, навагодняя акцыя «Нашы дзеці» ладзіцца ў Беларусі з 1995 года ў адпаведнасці з нацыянальнымі планамі дзеянняў па паляпшэнні становішча дзяцей і ахове іх правоў. Прызнана, што гэта вельмі важны сацыяльны праект: акцыя накіравана на аказанне дапамогі хлопчыкам і дзяўчынкам, якія апынуліся ў складанай жыццёвай сітуацыі і маюць патрэбу ў асаблівай увазе дзяржавы і грамадства. А шчырымі чараўнікамі, у чыіх сілах пераўтварыць дзіцячыя будні ў казку, з’яўляюцца прадстаўнікі грамадскасці, кіраўнікі органаў дзяржаўнага кіравання рознага ўзроўню, работнікі арганізацый і прадпрыемстваў, іншыя неабыякавыя людзі: здаецца, без іх увагі не застаецца ніводнае дзіця.

Сёння бацькі-выхавальнікі дзіцячага дома сямейнага тыпу Вольга і Юрый Бакуменкі падымаюць на ногі дзесяць дзетак, чацвёра з якіх — інваліды. Як жыве гэтая вялікая сям’я, рэгулярна цікавяцца не толькі спецыялісты адпаведных службаў, але і прадстаўнікі ўлады, якія прыязджаюць не з інспектаваннем, а з падарункамі. Традыйцыйная нагода для візіту — навагоднія святы. На мінулым тыдні, напрыклад, у гасцях у Бакуменкаў пабывалі старшыня райвыканкама Міхаіл Крэйдзіч і старшыня раённай арганізацыі ГА «Беларускі фонд міру» Мікалай Кудравец з падарункамі і святочнымі віншаваннямі.

Словы асаблівай удзячнасці госці дзіцячага дома не перастаюць адрасаваць Вользе Міхайлаўне — захавальніцы гэтага сямейнага ачага. Варта адзначыць, што тут не проста кормяць і апранаюць дзяцей да іх паўналецця: сваіх выхаванцаў падтрымліваюць да той пары, пакуль яны самі не стануць на ногі. Таму амаль кожныя выхадныя пад дахам вялікага дома збіраецца 23 прыёмныя дзіцяці. Сярод іх і студэнты, і маладыя спецыялісты якія ведаюць, што дзверы ў дом Бакуменкаў для іх заўсёды адчыненыя.

Вольга Міхайлаўна шчыра радуецца поспехам малодшых, з цеплынёй расказвае пра дасягненні сваіх дарослых дзяцей:

— Улад, напрыклад, знайшоў сябе ў якасці цырульніка: плануем дапамагчы яму адкрыць сваю справу ў Ружанах. Тым, хто сёння жыве і працуе ў пасёлку, толькі за 2017 год купілі чатыры хаты, дзе паступова мяркуем зрабіць рэканструкцыю.

Бакуменкі ўдзячныя і адміністрацыі гаспадарак, арганізацый, якія без прамаруджвання адгукаюцца на іх просьбы аб дапамозе: ААТ «Велікасельскае Агра», «Мурава», «Ружаны-Агра», ААТ «Радзіма», Брэсцкая абласная доследная станцыя. Каб пракарміць вялікую сям’ю, бацькам-выхавальнікам,  даводзіцца трымаць вялікую гаспадарку:  каля 40 свіней, пад сотню курэй, столькі ж бройлераў, больш як па тры дзясяткі качак і індыкоў…

Дарэчы, у плане выхавання дзяцей у сям’і Бакуменкаў склалася пераемнасць пакаленняў: літаральна напярэдадні Новага года Лерына — родная дачка Вольгі Міхайлаўны і Юрыя Рыгоравіча — разам з мужам Аляксандрам усынавілі трох дзетак. Гэтаму важнаму кроку папярэднічаў амаль год вучобы адказнай справе бацькоўства.

Да слова, на сённяшні дзень дзіцячы дом сямейнага тыпу ў Ружанах — адзіны ў Пружанскім раёне. Але, як плануецца, сёлета павінен з’явіцца яшчэ адзін. А пакуль вырашаюцца пытанні па будоўлі жылля для другой вялікай сям’і, ідзе пошук людзей, гатовых узяць на сябе ролю выхавальнікаў дзіцячага дома сямейнага тыпу.

Марына Вакульская,  Сяргей Талашкевіч (фота).

Добавить комментарий

Ваш e-mail не будет опубликован. Обязательные поля помечены *