Суббота, 20 января 2018

Анёлы свету дзіва абвяшчаюць. З Ражством Хрыстовым!

394

Зямля і неба, зямля і неба

Радасна спяваюць.

Анёлы свету, Анёлы свету

Дзіва абвяшчаюць:

Хрыстос радзіўся, Бог аб’явіўся!

У гэтую сакральную ноч – калі, як вераць людзі, адкрываюцца нябёсы, радасную навіну пра Нараджэнне Хрыстова ў ліноўскія хаты прынясуць самыя сапраўдныя калядоўшчыкі — юныя артысты з фальклорна-этнаграфічнага гурта “Лінькі”, створанага пры мясцовай школе дзесяць гадоў таму. Цудоўная традыцыя калядавання была закладзеная імі з самага пачатку існавання ансамбля. Аднак да гэтага часу яго ўдзельнікі калядавалі толькі ў школе і дзіцячым садку, а сёлета нарэшце выйдуць у людзі, так бы мовіць, у вялікі свет.

Па традыцыі наперадзе ўсіх з самаробнай “Віфлеемскай зоркай”, якая сімвалізуе вешчуноў з Усходу, пойдзе “звяздар”, ён будзе стукаць у дзверы і гучна запяваць, за ім — “званар”, які панясе званочак і будзе здалёк абвяшчаць звонам усёй акрузе, што ідуць калядоўшчыкі. А ззаду за ўсiмi будзе ісці “механоша”, у мяшок якога шчодрыя гаспадары  абавязкова пакладуць гасцінцы: цукеркі, пячэнне, а можа, і грошы…

— Нам, беларусам, пашанцавала ледзь ці не болей за іншых, — адзначае заўзятая калядоўшчыца, кіраўнік ансамбля Людміла Аляксандраўна Бяскроўная. — Справа ў тым, што мы адзначаем свята Божага Нараджэння і Каляды двойчы, пачынаючы з 25 снежня. Зараз самы час хадзіць па хатах, спяваць калядныя песні і жадаць людзям добрага Новага года, міру, шчасця і дабрабыту. Дарэмна многія лічаць, што калядаванне — гэта язычніцкі звычай. Так, карані яго менавіта такія, аднак жа з прыходам хрысціянства гэта дзейства было пераасэнсавана па-іншаму.

Калядкі — радасны вокліч душы верніка. Радасць жа пра Бога, які нарадзіўся, кожны чалавек выказвае па-свойму: адны спяшаюцца на набажэнства, іншыя гатуюць святочны абед, а калядоўшчыкі спяваюць людзям пра найвялікшую падзею ў сусветнай гісторыі і прыносяць у хаты асаблівую атмасферу святочнага настрою. Тыя, хто слухаюць калядоўшчыкаў, маюць выдатную магчымасць праявіць шчодрасць — “казе на кожны ражок пакласці піражок” — і разам парадавацца нара-джэнню Збавіцеля ўсёй зямлі.

Алена Зялевіч, Сяргей Талашкевіч (фота).

Добавить комментарий

Ваш e-mail не будет опубликован. Обязательные поля помечены *