Пятница, 21 сентября 2018

В Пружанах родился «ребенок мира»!

1 363

У гэтыя чароўныя дзянькі бабінага лета па ўсёй краіне праходзіць штогадовая міжнародная акцыя «Дзіця міру». У мінулую сераду разам з асаблівым цяплом і яркім сонцам прыйшла яна і ў Пружаны.

Традыцыйна вось ужо які год запар па ініцыятыве раённага аддзялення грамадскай арганізацыі «Беларускі фонд міру» прымаюць віншаванні мамы і таты, дзеткі якіх з’явіліся на свет 21 верасня, у Міжнародны дзень міру.

У гэты дзень у нашым горадзе нарадзілася толькі адно дзіця – прыгожы ружовашчокі хлопчык Данііл. Цудоўныя кветкі, памятныя прызы і падарункавы сертыфікат на суму 50 рублёў былі ўручаны яго бацькам Аляксандру Міхайлавічу і Дар’і Ігараўне Пакалам. Абодва працуюць на Пружанскім ільнозаводзе: тата — начальнікам вытворчасці, а мама — сакратаром.

З вуснаў старшыні раённага аддзялення Беларускага фонду міру  М.П. Кудраўца і яго намесніка Т.Ю. Гаманчук у адрас галоўнага «віноўніка» ўрачыстасці, яго бацькоў і старэйшага браціка Кірыла прагучалі самыя цёплыя словы:

— «Дзіця свету» — гэта асаблівае званне і асаблівая адказнасць для сям’і, — адзначыў Мікалай Пятровіч. — Упэўнены, што вы пастараецеся даць дзіцяці самае добрае і прывіць яму павагу да такога святога паняцця, як мір. Хай ваш хлопчык нясе цяпло і любоў у свет, хай расце добрым чалавекам і праяўляе міласэрнасць да ўсяго жывога навокал. А маме Дар’і жадаю, каб квітнела, як прыгожая ружа, у асяроддзі трох сапраўдных мужчын.

— Я заўсёды марыла аб вялікай сям’і. Дасць Бог, з’явіцца ў нас і яшчэ адна ружа, а пакуль мая галоўная задача — выхоўваць сыноў так, каб з іх выраслі годныя мужчыны, якія будуць паважаць жанчыну і разумець, што ў гэтым свеце няма нічога больш святога, чым сям’я. З дапамогай Бога і нябесных заступнікаў маіх дзетак — а я невыпадкова назвала іх па царкоўным календары прыгожымі імёнамі святых — так і будзе.

Ужо цяпер, гледзячы на малодшага сына, веру, што мой «мірны» хлопчык будзе паважліва і міласэрна ставіцца да людзей: ён вельмі спакойны, назіральны, заўсёды ўсміхаецца.

Увогуле, дзякуючы сваім “восеньскім” дзеткам (старэйшы сын нарадзіўся ў лістападзе), я палюбіла восень і бачу ў ёй асаблівае хараство, — усміхаецца шчаслівая жанчына.

 

Алена Зялевіч,

фота Сяргея Талашкевіча.

2 комментариев

  • Бебека

    50 рублей, Карл.50 рублей.

    Рейтинг комментария:Vote +10Vote -10

  • Sralee Muhee

    Лучше б уже не позорились с 50-ю рублями… ???

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *