Пятница, 15 декабря 2017

Когда можно, а когда — осторожно. Достаточно ли району 4 водоемов для купания?

614

У гарачыя жнівеньскія дзянькі рэзка павялічылася колькасць людзей ля вады. Сем’і і кампаніі, дзясяткі і нават сотні чалавек пацягнуліся бліжэй да азёр і сажалак, каб збегчы ад гарачага асфальту і нагрэтага бетону. Ці ўсе і заўсёды пры гэтым думаюць аб уласнай бяспецы? Для адказу на гэта пытанне журналісты правялі рэйд па вадаёмах раёна разам з супрацоўнікам міліцыі А.В.Кунцэвічам і старшынёй раённага таварыства выратавання на вадзе Ю.М.Амельянчуком.

Лінова Вадаём каля гэтага населенага пункта карыстаецца попытам не толькі сярод мясцовых вяскоўцаў, але і нават жыхароў райцэнтра і бліжэйшых вёсак. Як расказвае Ю.М. Амельянчук, справа ў тым, што сярод абследаваных водных аб’ектаў, прызнаных годнымі для купання, возера ў Лінова самае чыстае, дзякуючы падводным крыніцам. Прыязджаюць сюды і з дзятвой, і кампаніі адпачываючых.

 У дзень нашага рэйда на беразе і ў вадзе было не менш за паўсотні чалавек.
А вось прызнаць, што бераг абсталяваны належным чынам, можна толькі з вялікай нацяжкай. Перапоўненыя сметніцы, відавочна, не чысціліся некалькі дзён. А.В.Кунцэвіч кажа, што ў чэрвені арганізацыям, адказным за парадак у гэтай зоне адпачынку, былі накіраваны інфармацыі аб неабходнасці ўборкі смецця. 

Цяпер жа будуць рыхтавацца прадпісанні з вызначэннем канкрэтных тэрмінаў выканання. Праігнараваць іх не ўдасца, тут ужо прадугледжаны штрафныя санкцыі.

Пружаны
Гарадское возера — не менш папулярнае месца адпачынку. Увечары ў мінулую сераду — вельмі гарачы дзень — тут сабралася больш за 200 чалавек. Здаецца, для іх адпачынку былі створаны ўсе ўмовы: ёсць пляж, спартыўныя пляцоўкі, прыбіральня, кабінкі для пераапранання і нават месца для купання малых. Побач працуе кіёск райспажыўтаварыства, дзе можна набыць марожанае і напоі. За бяспекай сочаць матросы выратавальнага паста.
Але нельга сказаць, што адпачынак тут арганізаваны ідэальна. Па-першае, для такой колькасці людзей падрыхтаваны пляж шырынёй усяго дзесяць метраў. Далей увесь бераг зацягнуты чаротам. У выніку ў вадзе «натоўп», як на Крымскім узбярэжжы.
Варта адзначыць, што гараджане не заўсёды разумна рэагуюць на заўвагі матросаў-выратавальнікаў, хаця тыя ж клапоцяцца аб бяспецы купальшчыкаў. Мы сталі сведкамі такой размовы:
— Жанчына, не плывіце далёка на надзіманым матрацы.
— А чаму вы мне забараняеце?
— Нядаўна здарылася трагедыя, калі жанчына патанула на такім плавальным сродку.
— Са мною такога не будзе. І не ўказвайце мне, што рабіць.
Схапіць за руку, забараніць, нейкім чынам пакараць «вадзяных хуліганаў» матрос-выратавальнік не мае права. Толькі тлумачыць, адгаворваць, хаця словы даходзяць не да ўсіх.
Або такая сітуацыя: малады мужчына ўбачыў фатографа газеты і папрасіў сфатаграфаваць тое, што плавае каля берага. Адразу задаю пытанні:
— Адкуль гэтыя бутэлькі тут узяліся, ці не вашы? Не? А чаму самі не занесеце ў сметніцу, калі глядзець непрыемна?
Сапраўды, пасля сябе адпачываючыя пакідаюць горы смецця, прычым тыя, хто прыходзіць на ўжо засмечаны бераг, нават не спрабуе прыбрацца вакол сябе. Няўжо лепш загараць сярод пустых бутэлек і рэшткаў ежы і чакаць, калі прыйдзе работнік камунальнай службы?

Носкі
На маю думку, гэта — самае прыемнае месца адпачынку: побач няма буйных населеных пунктаў, даязджаюць сюды нямногія. Выдатна за парадкам сочаць работнікі лясгаса.
Вось толькі паралельна ўзнікае лагічнае пытанне: для каго зроблена гэтае месца адпачынку, калі ў самы спякотны дзень на беразе налічвалася каля дзясятка чалавек? У той жа час зусім няма дазволенага месца для адпачынку ў Шарашэве, дзе жадаючых купацца значна больш.

Забарона не рашае праблему?
Мы аб’ехалі шэраг вадаёмаў, якія не былі абследаваны, не абсталяваны належным чынам, а значыць, купацца там забаронена. Практычна на кожным размешчаны шыльды з адпаведнай інфармацыяй. Але… адпачываючых з-за гэтага не меншае.
Як расказвае А.В.Кунцэвіч, практычна кожны месяц складаюцца дзясяткі пратаколаў за купанне ў забароненых месцах. Прычым не толькі на дзяцей, але і на дарослых.
У праўдзівасці такой інфармацыі мы пераканаліся і на сажалцы ў канцы вуліцы Вінаградава ў райцэнтры, і на возеры каля в.Белавусаўшчына, і на астатніх водных аб’ектах, дзе пабывалі. Практычна адразу дзятва, калі бачыць міліцэйскую форму, пырскае ў кустоўе, хапае веласіпеды ды наўцёкі. Нават адзенне пакідаюць на беразе. Зразумела, яны ведаюць: міліцыянер начаваць ля вады не будзе, хутка паедзе па іншых справах. І можна зноў вярнуцца.
Дарослыя бегаць ад міліцыі сабе не дазваляюць, і некалькі пратаколаў падчас нашага рэйда былі складзены. Сярэдняя сума штрафу — адна базавая велічыня.
Відавочна, што такі падыход праблемы не вырашае. Сумняваюся, што стануць ездзіць жыхары Белавусаўшчыны, Калядзічаў, Кабылаўкі і іншых вёсак туды, дзе купацца можна. Бо такіх вадаёмаў у нашым раёне ўсяго чатыры — пералічаныя намі вышэй гарадская сажалка і вадаёмы каля вёсак Носкі і Лінова ды плюс возера Паперня ў Ружанах. Асабліва праблемнай зонай старшыня раённага таварыства выратавання на водах лічыць так званы гарадскі басейн. Гэта проста нонсэнс, што ў цэнтры горада знаходзіцца не абсталяваны для купання вадаём, дзе забараняецца нават заходзіць у ваду. Безумоўна, што, колькі ні выганяй адсюль людзей, колькі ні штрафуй, тут усё роўна будуць збірацца адпачываючыя. Калі мы толькі пад’ехалі, то ўбачылі, як дзясяткі тры падлеткаў разбегліся па кустах. З аднаго боку, хочацца спытаць у іх бацькоў: ці ведаюць яны, дзе іх дзеці? Не абсталяваны вадаём, дзе і выратавальнага паста няма, нясе вялікую небяспеку. Два гады запар тут тапіліся людзі. Але куды падзецца дзятве з навакольных мікрараёнаў? Ехаць на веласіпедзе праз увесь горад на вуліцу Пушкіна? Таксама небяспека, на гэты раз, трапіць у аварыю на перапоўненых транспартам гарадскіх вуліцах. Нямала абурэння наконт гэтага нам выказалі гараджане, якіх сустрэлі на беразе. Маўляў, лепш уладкуйце зону адпачынку, а не забараняйце.
Як зазначае Юрый Міхайлавіч, гэта праблема — толькі фінансавага парадку, бо раней гэты вадаём прызнаваўся годным для купання. Ачысціць зону купання, паставіць кабінкі для пераапранання ды прыбіральню не так і доўга. Калі гэта будзе зроблена, то таварыства выратавання на вадзе ахвотна пойдзе на стварэнне тут выратавальнага паста.

Яшчэ адна бяда
Усё сказанае вышэй адносіцца да тых катэгорый лю-дзей, якія адпачываюць ля вады. Але ёсць і яшчэ адна: тыя, хто на беразе выпівае. У гэтым мы таксама пераканаліся. На вадаёме ў канцы вуліцы Вінаградава была затрымана кампанія, якая «на трох» распівала спіртное. Прычым адзін з іх летась быў у той кампаніі, што выпівала ля гарадскога басейна, калі патануў чалавек. І цяпер было бачна, што выпівакі паспелі ўжо акунуцца ў ваду. Дарэчы, пустыя бутэлькі з-пад піва, віна або гарэлкі мы бачылі на ўсіх вадаёмах. У прыватных гутарках тыя, каго паспелі затрымаць за такія парушэнні, запэўнівалі міліцыянераў, што ў ваду яны не палезуць. Ці можна ім верыць, калі здаўна вядома прымаўка: «П’янаму мора па калена»?

Достаточно ли району 4 водоемов для купания?

Загрузка ... Загрузка ...

Алег СІДАРЭНКА, Сяргей ТАЛАШКЕВІЧ (фота).

2 комментариев

  • адпачываючый

    На днях пайшоў, захапіўшы рушнік і плед, да мясцовага бассейна. Толькі перайшоў праз мосцік, пад якім сабралася ціна, затрыманая ўпаўшай ніжэй па цячэнню галінай, як адчуў нешта нятое. Вакол басейна ёсць людзі, а у вадзе, нягледзячы на спякоту – ні аднаго чалавека. Насустрач едуць хлопцы на ровэры. Пытаюся іх, чаму ў вадзе няма людзёў. Да забаронена тут плаваць. А што там робіць чалавек у блакітнай кашулі з планшэтам ў руках? Да мы ня ведаем. Дык я ведаю! І спыніўся я ля купкі дрэваў і стаў ўглядацца ў далечыню. Пытаюся: «А колькі іх там?» «Два чалавекі»- адказ. Усё ясна — складаецца пратакол. І прыйшлося павярнуцца і пешшу шпарыць два кіламетры па плыні ракі Мухавец, а потым паўкіламетра супраць плані рэчкі Бабы. І думаць сваю думу. Думалася мне, як раней было добра разагрэць свае косці бегам трусцой на стадыёне за паркам. А потым не спяшаючыся працягнуці бег, захапіўшы пакладзены на трыбуну рушнік і мыла, з пылу і спёкі акунуцца ў чыстыя хвалі бассейна. Якія куды чысцейшыя чымся возера, бо басейн ад горада адгарожаны рэчышчам канала Вец і рэчкі Муха. Ад угнаенняў з палёў з трэцяга боку адгарожаны нававыкапаным каналам Муха. Там, у глыбіне басейна нават ракі жывуць. А гэтае возера прымае ваду і талую і дажджавую скрозь з усіх суседніх палёў. Ну можа ад радыёзавода і асфальтавага шасэ вада прама міма возера ў Бабу цяцэ. Але ж мясцовы закон – пастанова мясцовай ўлады дзейнічае. І я , як шчыры грамадзянін, цяпер крочашчы да возера, у спякоту, яго дакладна прытрымліваюся. І, праходзячы міма вычышчанага рэчашча насупраць райвыканкама, падумалася: « Я ж магу даць распіску такога ж кшталту, што пішуць калі жадаюць пракатацца на дэльтаплане ці параплане». « Я, Грамадзянін Такі-та, збіраючыся займацца патэнцыйна небяспечным спортам, не – не спортам, а дзеяннем, свядома ўсведамляючы магчымаю небяспеку, здымаю адказнасць з мясцовых органаў улады і ўнутраных спраў ад адмоўных наступстваў, выкліканых маімі дзеяннямі і выпадкамі, адбыўшыміся з-за дзеяння непераадольных сілаў».
    Толькі хто ў мяне гэтую распіску прыме і зарэгіструе?
    Мне ня трэба, каб быў выратоўваючы пост ля бассейна. Хачу (якое нахабнае слова- хачу), хочаца, мець магчымасць выкарыстаць свой цвярозы стан, уменне плываць і імкненне падтрымаць добры настрой і сваё здароўе. Ля кожнага, такога як я не паставіш выратоўваючы пост. Разумею, што ўся сістэма аховы жыцця акунаючыхся ў ваду пабудавана ад добрых намераў. Але незаўважна нешта істотнае пры гэтым было незаўважана. І гэта істотнае не неіснуючый на беразе басейна пост, а павага да мяна, як да грамадзяніна.
    Мяркуючы па таму, што каментар мой першы і, можа апошні, тэма гэтая нікога не турбуе.

    Рейтинг комментария:Vote +10Vote -10

  • Мел-нашаўсе

    Ета пральная: пусть кажды гараджанін выходзіць на вуліцы з мусарным пакетам і збірае мусар! Ідзеш у васкрасенне на рынак і збіраеш па дарозе, а што дзельная прадложэнія даюць таварышчы журналісты! Пусць кажды убярэць мусар, які валяецца каля яго і будзе чыста! Можна скараціць дворнікаў і камунальнік, будзе аканомія бюджэту для прыабрыценія новых аўтазакаў і срэдств зашчыты ад бяздзельнікаў!

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *