На мінулых выхадных дысказала Палаца культуры пераўтварылася ў выставачны салон. Аснову жывой экспазіцыі склалі галубы.
Варта адзначыць, такое мерапрыемства праходзіць у Пружанах не першы раз і традыцыйна пачынаецца з выпускання галубоў. Але сёлета не абышлося без адметнасцяў. Так, адной з іх стала тое, што, па суседству з галубамі размясціліся іншыя дэкаратыўныя птушкі і жывёлы.
Чарговая выстава аказалася юбілейнай: у дзясяты раз пружанцам прадаставілі магчымасць не проста бясплатна пазнаёміцца з разнастайнасцю галубінага свету, але на гэты раз убачыць яшчэ і рэдкія пароды трусоў, палюбавацца экзатычнымі рознакаляровымі качкамі — мандарынкамі і каралінкамі, сфатаграфавацца каля чучалаў паўліна і дэкаратыўных фазанаў.
Чарговая выстава сабрала рэкордную для Пружан колькасць аматараў экзотаў: удзел прымалі больш 20 чалавек. Хаця дзесяць гадоў таму ўсё пачыналася з некалькіх клетак з птушкамі, якіх размясцілі ў заамагазіне невялічкай плошчы ўсяго два мясцовыя галубаводы Сяргей Буза і Алег Чарнагалаў.
Але сёлета пад купалам дысказалы суседнічалі каля пяці дзясяткаў парод галубоў розных масцей. Практычна ніводную з тых птушак вы не сустрэнеце на гарадскіх вуліцах: галубаводы з Пружан, Шарашова, Лінова, Брэста і Навагрудка прадставілі даволі рэдкія пароды — англійскіх тыплераў, агаранаў, кітайскіх чаек, архангельскіх снегіроў, паўлінаў, польскую рысь, трубачоў барабаншчыкаў, капуцынаў, кучаравых венгерскіх, ржэўскіх стужкавых, гумбінскіх белагаловых…
Цэлую кампазіцыю: дэкаратыўных курэй, перапялоў, трусоў і качак — прадставіў Эдуард Міцкевіч. Дарэчы, у Брэсце ў мужчыны цэлая ферма экзотаў, ёсць нават паўліны. Пёры апошніх карысталіся асаблівай папулярнасцю ў маленькіх наведвальнікаў выставы. Побач дэманстравалі трусоў пароды французскі баран Анастасія і Аляксандр Ціхановічы з Ляхоў. Увогуле, як прызналіся яны, у невялікай гаспадарцы, якую завялі тры гады таму, налічваецца каля сарака трусоў такіх парод, як стракаты немец, бельгійскі велікан, вялікае светлае серабро.
Новы статус — не проста выстава, але і кірмаш — даваў магчымасць наведвальнікам, якія зацікавіліся жывымі экспанатамі, набыць парачку экзотаў і ўступіць у рады галубаводаў ці трусаводаў. Для непасрэдных удзельнікаў мерапрыемства гэта была магчымасць завесці новыя знаёмствы, абмяняцца птушкамі і проста пагутарыць з такімі ж энтузіястамі. Напрыклад, самы малады ўдзельнік выставы Дзяніс Сасім з Навагрудка першы раз удзельнічаў у падобным мерапрыемстве. Валерый Астраханцаў з Лінова прывёз у нашу мясцовасць рэдкую пароду ўзбекскіх байцовых галубоў. Удзел у выставе другі раз прымаюць 78-гадовы Васіль Фунт і 70-гадовы Уладзімір Шырма: пружанскія пенсіянеры яшчэ маленькімі хлапчукамі ўлюбіліся ў гэтую птушку. «Голуб — Божая птушка», — гавораць мужчыны і шчыра здзіўляюцца, як можна не захапіцца яе прыгажосцю. Калекцыю пружанца Сяргея Гародніка называюць самай разнастайнай: галубятні мужчыны на Брэстчыне знойдзецца мала роўных па колькасці парод. Вось ужо колькі гадоў не адмаўляецца ад свайго дзіцячага захаплення і Сяргей Буза — арганізатар выставы, уладальнік самай тытулаванай калекцыі галубоў.
Падчас закрыцця выставы ўсе яе ўдзельнікі атрымалі граматы і памятныя падарункі.
Цікавыя факты
*Птушкай міру сталі называць галубоў пасля заканчэння Другой сусветнай вайны, калі Пабла Пікаса намаляваў белага голуба з аліўкавай галінкай у дзюбе. Але гэты сімвал мастак «падгледзеў» у Бібліі. Менавіта галубка прынёсла Ною галінку масліны ў знак таго, што вада пасля патопу сышла.
* Галубоў разводзяць дзеля дэкаратыўных альбо спартыўных мэт. Але ёсць спецыяльныя пароды, такія як штрасэр, мадэнскі, кінг і іншыя, якіх ужываюць у ежу ў некаторых краінах. Мяса маладых галубоў цэніцца больш за ўсё.
* Голуб — птушка вынослівая і вельмі моцная, за што яе і цанілі ў часы галубінай пошты. Галубы могуць развіваць хуткасць да 140 кіламетраў у гадзіну і пралятаць адлегласць да 3000 кіламетраў. Дзякуючы хуткасці птушкі і быў створаны від спорту — спаборніцтвы паштовых галубоў. Раз у два гады ладзяцца нават алімпіяды і конкурсы для гэтых птушак.
Марына ВАКУЛЬСКАЯ, Сяргей ТАЛАШКЕВІЧ (фота).