У мінулую пятніцу пасля апоўдня неба пачало хмурыцца, а потым пайшоў праліўны дождж. Але непагода не стала перашкодай для ўшанавання лідараў сёлетняга жніва на Пружаншчыне. Асноўныя падзеі разгортваліся на ячменным палетку ААТ «Жураўлінае» непадалёку ад вёскі Андрыянаўка.
Павіншаваць лепшых працаўнікоў прыехалі высокія госці з Мінска і Брэста: старшыня рэспубліканскага прафсаюза работнікаў аграпрамысловага комплексу М.А. Лабушаў, старшыня абласной арганізацыі прафсаюза работнікаў аграпрамысловага комплексу М.І.Юхімук, упраўляючы кампаніі холдынга «Агракамбінат «Мачулішчы» В.І.Акуліч, намеснік старшыні камітэта па сельскай гаспадарцы і харчаванні аблвыканкама А.В.Дарашэнка.
А віноўнікамі ўрачыстасці сталі вадзіцель і сямейны экіпаж з ААТ «Жураўлінае».
У мінулых нумарах «раёнка» пісала пра маладога вадзіцеля М.С.Ільючыка, які першым у вобласці аўтамабілем «МАЗ-551605» перавёз ад камбайнаў 2 тысячы тон збожжа, і экіпаж камбайна «КЗС-1218» у складзе старшага камбайнера Дзмітрыя Ціцянкова і камбайнера Аляксандра Дзянісава, які першым на Брэстчыне намалаціў 1 тысячу тон збожжа сярод сямейных экіпажаў.
Шмат слоў удзячнасці было выказана ў адрас перадавікоў жніва. Ну і, вядома, не абышлося без падарункаў і грамат.
На здымку: віноўнікі ўрачыстасці прымаюць віншаванні ад упраўляючага кампаніі холдынга «Агракамбінат «Мачулішчы» В.І.Акуліча, дырэктара ААТ «Жураўлінае» М.М.Грышкевіча і старшыні рэспубліканскага прафсаюза работнікаў аграпрамысловага комплексу М.А.Лабушава.
Мікола АРХУЦІК,
Сяргей ТАЛАШКЕВІЧ (фота)