Понедельник, 22 января 2018

Леанід Несцярчук у Пружанах прэзентаваў сваю новую кнігу «Міхал Клеафас Агінскі: Ліцвін. Патрыёт. Творца»

1 433

У пятніцу ў малой зале Палаца культуры, безумоўна, магло быць і больш народу: проста мала хто ведаў, што тут шырокаму колу пружанцаў збіраюцца прадставіць кнігу брэсцкага гісторыка Леаніда Несцерчука. Чарговая работа краязнаўцы прысвечана кампазітару, дыпламату і палітычнаму дзеячу Рэчы Паспалітай М.К.Агінскаму.IMG_2777

Сёлета грамадскасць адзначае 250-годдзе з дня нараджэння Міхала Клеафаса Агінскага. Але на Брэстчыне ў цэнтры ўвагі аказалася не толькі гэтая выбітная асоба: справядліва сваю хвіліну славы атрымаў і кандыдат гістарычных навук, краязнаўца, былы галоўны спецыяліст упраўлення культуры аблвыканкама па ахове гісторыка-культурнай спадчыны Л.М.Несцярчук, які прыклаў шмат намаганняў для вывучэння жыцця і дзейнасці шматграннай асобы і ў выніку стварыў аб’ёмную манаграфію «Міхал Клеафас Агінскі: Ліцвін. Патрыёт. Творца».IMG_2816

Для таго, каб напісаць гэтую цікавую працу, Леанід Міхайлавіч перагартаў нямала дакументаў у архівах, пабываў у месцах, дзе некалі жыў М.К.Агінскі. У пошуках малавядомых фактаў пра героя сваёй манаграфіі аўтар працаваў у бібліятэцы Ватыкана, архівах Рыма і Фларэнцыі, музеі А.Міцкевіча ў Парыжы. У аснову кнігі ляглі каля 640 крыніц, якія дасканала вывучаны краязнаўцам. Некаторыя з іх Леанід Міхайлавіч першым з беларускіх даследчыкаў жыцця і дзейнасці Агінскага ўзяў у рукі. З добры дзясятак такіх знаходак аўтара зрабілі кнігу па-свойму ўнікальнай.

 Расказваць пра сваё новае тварэнне і яго галоўнага персанажа Леанід Несцярчук, здаецца, можа гадзінамі.

— Пачуцці, якія перапаўнялі мяне, калі пераступіў парог храма, дзе пахаваны Міхал Агінскі, складана перадаць словамі. Яго прах у саборы Санта Крочэ ў Фларэнцыі знаходзіцца побач з саркафагамі Мікеланджэла, Леанарда да Вінчы, Галілео Галілея…

Словы ўдзячнасці за прыхільнасць да высокай культуры Леанід Міхайлавіч выказаў С.Машкала, С.Казей, К.Дыба, якія ўпрыгожылі прэзентацыю сваімі выступленнямі.IMG_2820

Нельга не згадаць, што Леанід Несцярчук — ураджэнец Пружаншчыны. Таму ён не прамінуў скарыстацца магчымасцю падзяліцца з землякамі, як прыйшоў да вывучэння родных мясцін. Кажа, што, нарадзіўшыся ў мясцінах, якія яшчэ ў 1812-м увайшлі ў гісторыю, не змог прысвяціць сябе іншай галіне. Пазней Леанід Міхайлавіч узяўся за адраджэнне мясцовых аб’ектаў культуры — Гарадзечненскай царквы і капліцы. Увогуле, за два дзясяткі гадоў работы ва ўпраўленні культуры аблвыканкама Л.М.Несцярчук тым ці іншым чынам прыклаў руку прыкладна да 950 аб’ектаў: што аднаўлялі, што будавалі, што рамантавалі…

 Але вернемся да тэмы. Манаграфія «Міхал Клеафас Агінскі: Ліцвін. Патрыёт. Творца», якую надрукавалі тысячным тыражом у Брэсцкай друкарні, убачыла свет напярэдадні юбілею аўтара. Выданне, дарэчы, трынаццатае ў навуковым багажы Л.М.Несцерчука. Сам жа Леанід Міхайлавіч, які перасягнуў 70-гадовую мяжу жыцця, прызнаўся, што спыняцца на дасягнутым не збіраецца.

 

Марына Вакульская. Фота аўтара.    

2 комментариев

  • Чытач

    У загалоўку памылка — прэзентацыя не ў Палацыку, а ў Палацы культуры…

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *