Четверг, 20 сентября 2018

Спасибо женщинам за хлеб!

1 132

Магчыма, выпечка хлеба некалі была чыста мужчынскім заняткам. Не задумваліся, чаму словы «пекар», «хлебапёк» мужчынскага роду? А вось на Пружанскім хлебазаводзе хлеб вырабляецца выключна жаночымі рукамі. Як удакладніла начальнік участка хлебапякарнай вытворчасці Н.А.Жыдзецкая, тут працуюць 70 жанчын. — Прычын, чаму так атрымалася, вельмі многа,— разважае Ніна Адамаўна.04мар2015_5717

— Я думаю, звязана гэта з тым, што хлеб, нават у тых маштабах, што выпускае завод, патрабуе часцінку душы.

А яшчэ вялікі адбітак накладаюць і ўмовы работы. Нягледзячы на значную механізацыю працэсу, многае залежыць і ад саміх работнікаў. Уявіце сабе, што ўсю змену — восем гадзін — трэба прастаяць на нагах. Прычым не толькі ўдзень, але і ўначы. І вымешваць-выпякаць-раздзелваць-загружаць неабходна не адзін-два боханы, а тысячы.

— Зацішша ў нас бывае вельмі рэдка. І гэта норма, бо хлебныя паліцы ў магазінах не могуць пуставаць.

А колькі даводзіцца папрацаваць булачніцам, праз рукі якіх праходзіць тысячы вырабаў за змену! Пры гэтым булачкі павінны быць аднолькавыя і сіметрычныя.04мар2015_5721

Канешне, на заводзе нямала працы, якую выконваюць мужчыны. Але да хлеба падыходзяць толькі жанчыны.

Ніна Адамаўна сцвярджае, што ў справе хлебапячэння многае залежыць ад рыс характару: каля яго нельга нервавацца, выказваць крыўды і ленавацца. А яшчэ — ад вопыту. Сапраўднымі ветэранкамі завода можна назваць Людмілу Лявонцьеўну Качан і Таццяну Фёдараўну Зяваліч, якія за гады работы вырабілі сотні тон булачак, плюшак і вітушак. Багатым вопытам валодаюць пекары Алена Міхайлаўна Несцярук і Людміла Васільеўна Гушча. Цэняць тут Ніну Мікалаеўну Нічыпаровіч, якая адпрацавала на гэтым месцы значную частку свайго жыцця. Хаця жанчына і дасягнула пенсійнага ўзросту, але на заслужаны адпачынак ісці не спяшаецца. І гэтае рашэнне калектыў сустрэў з задавальненнем, бо ад яе работы ў многім залежыць агульны поспех.

Сярод першых Н.А.Жыдзецкая называе і В.У.Касцюкевіч, якая працуе на вытворчасці тэхнікам-тэхнолагам: гэта жанчына з неверагоднай фантазіяй. Усе караваі, якія завод прадстаўляў на конкурсы і для дэлегацый раёна, зроблены яе рукамі. А колькі навінак яна распрацавала! Уявіце сабе, што, зыходзячы з попыту спажыўцоў, у асартымент хлебазавода пастаянна ўносяцца змяненні,  ён папаўняецца пракладна раз у два месяцы. Некаторыя вырабы падрыхтаваны з улікам заўваг пакупнікоў, якія звяртаюцца да кіраўніцтва завода са сваімі просьбамі. Слушныя парады заўсёды прымаюцца да ўвагі. І сёння пружанскія хлебапёкі могуць выпускаць звыш 120 найменняў вырабаў! Дарэчы, многія рэцэптуры распрацаваны на месцы.04мар2015_5734

— Назвы таксама прыдумваем «мясцовыя». Хлеб «Хвалаўскі», «Ружанскі», «Ліноўскі» і іншыя карыстаюцца вялікім попытам. Падобныя вырабы не толькі займаюць дастойнае месца ў штодзённым рацыёне: іх бяруць з сабой, едучы ў госці, як часцінку сваёй малой радзімы,— зазначае начальнік участка.

За апошнія гады на заводзе прайшло істотнае пераўзбраенне: з’явілася новае абсталяванне, якое працуе па асобных камп’ютарных праграмах. Але былыя рытуалы тут таксама захоўваюцца. Напрыклад, нашы бабулі памятаюць, як у даўніну выпякаўся вясельны каравай: чужым у хаце не было месца. Так і на заводзе староннім уваход забаронены. Ёсць  у  жанчын-хлебапёкаў і свае сакрэты.

Калі меркаваць па тым, што і цяпер на завод прыходзяць маладыя дзяўчаты, у будучым прафесія хлебапёка ў Пружанах застанецца жаночай. Яно да лепшага: значыць, пружанцы і надалей будуць купляць смачны хлеб, выраблены жаночымі рукамі.

На здымках: чарговую партыю прадукцыі рыхтуюць (злева направа) С.Я.Багдановіч,                 А.Х.Крук, брыгадзір С.У. Аўсюк, Л.П.Прытульчык і Л.С.Талай; а гэты хлеб, што загружае пекар Л.В.Гушча, прыйдзе на сталы пружанцаў ранкам наступнага дня, Н.А. Жыдзецкая.

Алег СІДАРЭНКА,       Сяргей ТАЛАШКЕВІЧ (фота).

Добавить комментарий

Ваш e-mail не будет опубликован. Обязательные поля помечены *