15 студзеня 2025 года Пружанскаму раёну споўнілася 85 гадоў. За мінулы час на пружанскай зямлі адбылося нямала падзей, якія істотна змянілі аблічча рэгіёна, жыццё людзей. Працягваем успамінаць самыя значныя з іх.
Насамрэч, 5 гадоў — невялікі перыяд для гісторыі цэлага раёна. Але настолькі глабальныя змены адбыліся за гэты перыяд на Пружаншчыне, што можна смела сказаць, што наш рэгіён змяніўся кардынальна.
2005-2010 гады:
73 факт. У 1990 годзе малочная галіна нашага аграпрамысловага ком-плексу заявіла аб новым рэкордзе: за год атрымана 5000 кг малака ад каровы. Вось толькі потым пайшоў заняпад, штогод фіксавалася зніжэнне гэтага паказчыка. І толькі ў 2009 аграрыі аднавілі рэкорд амаль 20-гадовай даўнасці: 8 гаспадарак зноў выйшлі на такі ўзровень надояў.
74 факт. У спісе карэнных змен — узбуйненне сельгасгаспадарак, сярод якіх самымі вялікімі сталі ААТ «Ружаны-Агра» і «Жураўлінае», якія «ўвабралі» ў сябе 3-5 суседніх таварыстваў.
75 факт. А яшчэ на пружанскіх землях з’явіліся ЦЭЦ, новы будынак рэанімацыі, гінекалогіі і тэрапіі ЦРБ, Лядовы і Водны палацы, Свята-Мікалаеўская царква ў в. Смаляніца, басейны ў Мокраўскай і Навасёлкаўскай школах,адкрыты грамадска-культурны цэнтр «Мікалаеўскі» ААТ «Жураўлінае» ў в. Мокрае, пачаліся рэканструкцыі льнозавода і палацавага комплексу Сапегаў, прыродны газ прыйшоў у шэраг вёсак.
76 факт. Пружанскі раён стаў базавым па адпрацоўцы сістэмы сацыяльных стандартаў (44 паказчыкі). У выніку мы сталі ўзорным рэгіёнам для ўсёй рэспублікі.