Воскресенье, 14 июля 2024

Інфарматыка без разеткі? Гэта рэальна! У дзіцячым садку №4 рэалізуюць цікавы адукацыйны праект

685

Навукоўцы і даследчыкі даўно прыйшлі да высновы, што самым лепшым узростам для засваення замежнай мовы, спартыўных уменняў з’яўляецца пяцігадовы: маўляў, не перанасычаны ведамі дзіцячы мозг якраз набывае ўсе здольнасці для актыўнага навучання. А нядаўна была распрацавана яшчэ адна гіпотэза, згодна з якой менавіта ў гэтым узросце складаюцца ўсе падставы для развіцця лагічнага мыслення.

З улікам такой акалічнасці Нацыянальным паркам высокіх тэхналогій пры падтрымцы Міністэрства адукацыі Рэспублікі Беларусь быў распрацаваны праект «Інфарматыка без разеткі», рэалізацыя якога пачалася ў 2020/2021 навучальным годзе.

Першая спроба, у якой удзельнічалі некалькі дашкольных устаноў Мінска, прынесла станоўчыя вынікі, і праект «Інфарматыка без разеткі» было вырашана распаўсюдзіць на ўсю краіну. І ў наступным навучальным годзе да яго далучыліся дзясяткі дзіцячых садкоў па Беларусі, у тым ліку і на Пружаншчыне. Адной з такіх устаноў сталі яслі-сад №4 г.Пружаны.

Як тлумачаць складальнікі праекту, яго назва была абрана нездарма. Справа ў тым, што інфарматыка будуецца на алгарытмічных прынцыпах, дзеянне якіх поўнасцю адпавядае логіцы. Вось апошнюю і трэба развіваць, каб у будучым хутчэй авалодваць сучаснай навукай, лягчэй спасцігаць асновы камп’ютарнага праграмавання.

Жанна Севасцьянчук са сваімі выхаванцамі.

Як расказвае намеснік загадчыка па асноўнай дзейнасці Наталія Зелянеева, папярэдне кандыдаты на ўдзел у праекце праходзілі дыстанцыйнае навучанне, здавалі праверачнае тэсціраванне, па выніках якога атрымлівалі адпаведныя сертыфікаты. Праз такія выпрабаванні вырашыла прайсці педагог вышэйшай кваліфікацыйнай катэгорыі гэтага дзіцячага садка Жанна Севасцьянчук.

— Пасля ўзгаднення цьютары (настаўнікі-ўдзельнікі) атрымалі пакеты электронных матэрыялаў для выкарыстання іх у навучальным працэсе, — тлумачыць Наталія Анатольеўна. — Дасланай метадычнай базы было дастаткова для арганізацыі заняткаў у старэйшай групе выхаванцаў садка двойчы на тыдзень. Яны арганізоўваліся ў выглядзе гуртка, заданні якога мелі гульнявы характар.

Праз цікавыя задачы, рэбусы малыя вучыліся разважаць. Напрыклад, па ключавых прыкметах раскладалі фрукты, засялялі жывёл у спецыяльна прызначаныя для іх домікі. Асвойваць заданні ім дапамагаў кот Алесік, які быў абраны ў якасці брэнда праекта.

— У выніку дзятву настолькі зацікавілі такія заняткі, што яны сталі з задавальненнем прыходзіць «у госці да Алесіка», — дзеліцца ўражаннямі Жанна Мікалаеўна. — Праз гульні і цікавыя выпрабаванні дзеці атрымалі даволі істотны штуршок для разумовага развіцця.

Падчас заняткаў у рамках праекта.

Па словах выхавальніцы, тыя, хто на працягу года вучыўся па новым праекце, значна адрозніваюцца ад сваіх равеснікаў. Жанна Мікалаеўна амаль 30 гадоў настаўнічае ў дзіцячым садку і за мінулыя гады нярэдка выкарыстоўвала розныя інавацыйныя падыходы. Але менавіта гэты ўразіў яе сваімі вынікамі. Самае галоўнае, малыя сталі смела выказваць свае думкі і меркаванні. Напрыклад, пераважная большасць дзяцей адгадваюць загадкі інтуітыўна. А маленькія «інфарматыкі» разважаюць, шукаюць адпаведнасці, вызначаюць прыкметы. І на падставе лагічнага алгарытму прыходзяць да правільнай высновы.

— У прыватных гутарках такія змены адзначылі і бацькі, асабліва больш дарослае стаўленне іх дачок-сыноў да бытавых пытанняў. Дзеці інакш сталі паводзіць сябе, стваралася ўражанне, што іх жыццёвы вопыт «на галаву» пераўзыходзіць тое, чым вызначаюцца аднагодкі. Напрыклад, адна мама заўважыла, што сын па-іншаму стаў гуляць у шашкі: раней ён проста перасоўваў фішкі, а цяпер стаў думаць на кожным чарговым ходам.

Першая група ўдзельнікаў праекта «Інфарматыка без разеткі» сёлета выпусцілася, хутка яны стануць школьнікамі. Мяркуецца, што гэтыя дзеці адразу вызначацца ўзроўнем падрыхтоўкі і разумовага развіцця. Са свайго боку кіраўніцтва дашкольнай установы прызнала праект даволі цікавым і карысным, на падставе чаго будуюцца планы працягваць удзел у ім і ў наступным навучальным годзе. Да таго ж, інавацыя лічыцца адкрытай для ўсіх жадаючых, нават бацькі могуць самастойна далучацца да яго.

Алег Сідарэнка. Фота Кацярыны Масік