Раніцай у панядзелак першы званок празвінеў для 527 першакласнікаў раёна. Менавіта столькі новых вучняў упершыню селі за школьныя парты. Ажно 95 першакласнікаў прыйшлі сёлета ў СШ №5.
Як і яшчэ пяць школ раёна, СШ №5, атрымала ў падарунак інтэрактыўную дошку. А з гэтага года навучальная ўстанова пачне ўдзел у новым інавацыйным праекце, працягнецца і работа ў рамках трансгранічнага супрацоўніцтва з Польшчай і Украінай: пружанскія дзеці сустракаюцца з вучнямі з Гайнаўкі, абменьваюцца вопытам і сябруюць.
На ўрачыстай лінейцы прысутнічаў намеснік старшыні аблвыканкама Віктар Яўгенавіч Сакоўскі. Ён павіншаваў вучняў з Днём ведаў і падкрэсліў, што для яго гэты дзень таксама асаблівы: у першы клас пайшла яго ўнучка.
Атрымалі школьнікі віншаванні і ад сваіх шэфаў – ПМК-21. Старшыня прафкама Ніна Мікалаеўна Гарус уручыла прэмію вучаніцы 9 класа Ангеліне Клімец, якая да дня будаўніка зрабіла сваімі рукамі арганізацыі падарунак. Асабістыя віншаванні атрымаў дырэктар школы Іван Аляксеевіч Каробка, які ў Дзень ведаў адзначае свой дзень нараджэння.
Пасля ўрачыстасці амаль 800 вучняў накіраваліся ў школьныя класы, дзе іх, безумоўна, чакаюць новыя ўражанні, новыя веды.
*
Апошнія гады ўсталявалася добрая традыцыя, калі кіраўнікі ад-дзелаў райвыканкама, іншых служб і ведамстваў наведваюць школьныя ўрачыстыя лінейкі, прысвечаныя новаму навучальнаму году.
Не застаўся ў баку і старшыня райвыканкама М.М.Серкоў, які прыняў удзел ва ўрачыстасці, якая прайшла ў СШ №1. Трэба сказаць, што Міхаіл Мікалаевіч праяўляе непрыкрыты інтарэс да гарадскога мікрараёна, дзе размешчана школа. Неаднойчы ён сам выказваў планы па добраўпарадкаванні гэтай тэрыторыі, па стварэнні тут умоў як для баўлення вольнага часу моладзі, так і для адпачынку дарослых.
Не абышлося і без падарунка падчас школьнай лінейкі, калі старшыня ўручыў інтэрактыўную дошку для кабінета фізікі. На словах ён пажадаў школе не абмяжоўвацца ў «алфавітных» назвах класаў, каб у будучым напаўненне вучнямі патрабавала выкарыстоўваць іншыя літары, чым звыклыя ў апошнія гады «А, Б, В».
Кацярына Пашкевіч, Алег Сідарэнка, Сяргей Талашкевіч (фота).