Дзесяцікласнік СШ №5 Уладзімір Якуцэня вярнуўся з рэспубліканскай прадметнай алімпіяды па геаграфіі, якая праходзіла ў Баранавічах, з дыпломам трэцяй ступені. Дарэчы, прызавыя месцы па геаграфіі дастаюцца школе рэгулярна: з усімі прызёрамі займаўся і займаецца настаўнік Юрый Уладзіміравіч Ляўчук.
Валодзю Якуцэню настаўнік узяў сабе на заметку яшчэ ў шостым класе. Але цікавасць да геаграфіі ў хлопца прачнулася намнога раней. Ужо ў першым класе ён выдатна арыентаваўся ў па-літычнай карце свету.
Як сцвярджае Валодзя, чытаць ён навучыўся задоўга да школы і ў хуткім часе яго любімымі кнігамі сталі дапаможнікі па геаграфіі. Да свайго настаўніка ён прыйшоў з вялікім багажом ведаў.
— У Валодзі цудоўная памяць, — расказвае пра вучня Юрый Уладзіміравіч. – Ён чытае ўсё, што я яму рэкамендую. Зараз ён ужо дарослы і з усёй адказнасцю адносіцца да падрыхтоўкі. Яшчэ ў мінулым годзе нам не хапіла гэтай самастойнасці, а сёлета мая дапамога больш заключалася ў псіхалагічнай падтрымцы.
У гэтым годзе на алімпіядах было шмат новаўвядзенняў: відэа-пытанні, слайд-шоу, палявая практыка. Тым не менш, юнак справіўся з усімі і, больш таго, выдатна паказаў сябе падчас бонуснага туру – геаграфія на англійскай мове.
Хаця канкурыраваць з ліцэямі і гімназіямі з кожным разам становіцца ўсё цяжэй, на будучыню ў вучня і настаўніка значныя планы: удзел у алімпіядзе наступнага года і паступленне на геафак ВНУ. Для гэтага яны працягнуць займацца па распрацаванай Юрыем Уладзіміравічам сістэме. Адзін з важных момантаў сістэмы — уменне вучня працаваць самастойна, а таксама ўвага з боку бацькоў.
19 мая ў Брэсцкім абласным цэнтры маладзёжнай творчасці адбылася ўрачыстая сустрэча пераможцаў рэспубліканскіх алімпіяд з губернатарам К.А. Сумарам. Канстанцін Андрэевіч уручыў дыпломы пераможцам і іх настаўнікам. Адзінымі прадстаўнікамі нашага раёна былі Уладзімір Якуцэня і яго настаўнік Юрый Уладзіміравіч Ляўчук.
Кацярына Пашкевіч, Аляксандр Мелеш (фота).