Па выніках мінулага года ў рэспубліканскім аглядзе-конкурсе санітарнага стану і добраўпарадкавання населеных пунктаў сярод гарадоў чацвёртай групы першае месца заваявалі Пружаны. З гэтай нагоды ў мінулую суботу раённы цэнтр наведалі намеснік міністра жыллёва-камунальнай гаспадаркі Рэспублікі Беларусь М.С.Ліпень і намеснік генеральнага дырэктара абласнога ўпраўлення ЖКГ М.П.Ёлап. 
У райвыканкаме ў прысутнасці прадстаўнікоў адказных за стан горада прадпрыемстваў і арганізацый, кіраўніцтва раённага Савета дэпутатаў і загадчыкаў аддзелаў райвыканкама адбылося ўрачыстае ўручэнне пераходнага Чырвонага вымпела пераможцы. Старшыня райвыканкама А.І.Юркевіч, прыняўшы з рук намесніка міністра дарагую ўзнагароду, тут жа перадаў яе дырэктару КУВП «Камунальнік» А.Ф.Шопіку (на здымку) з наказам працаваць так, каб і далей міністры прыязджалі ў Пружаны
толькі для пераўручэння
такіх вымпелаў.
Перамога ў гэтым конкурсе, безумоўна, з’яўляецца высокай адзнакай работы выканаўчай улады і службы камунальнай гаспадаркі раёна. Гэта адзначалі, віншаваўшы прысутных з заслужанай узнагародай, і шаноўныя госці. Старшыня райвыканкама ў сваёй прамове завастрыў увагу на тым, што ў горадзе не проста наведзены парадак,— іншымі сталі самі гараджане. Яны адчуваюць асабістую адказнасць за стан вуліц і двароў. Выхаванню гаспадарлівасці, акуратнасці і адказнасці, сказаў Аляксандр Іванавіч, і ў далейшым будзе ўдзяляцца значная ўвага.
Старшыня райвыканкама назваў лічбы: у 2007 годзе ў Пружанах было заасфальтавана 5,4 км вуліц, у 2008-ым — 12,1 км, 2009-ым — 5 км, 2010-ым — 7,3 км. Усяго ж у горадзе ўжо заасфальтавана 82% вуліц. Праграмай развіцця раёна на 2011-2015 гады запланавана давядзенне гэтай колькасці да 100%, завяршэнне бягучага рамонту асфальтавага пакрыцця ўсіх дваровых тэрыторый шматпавярховых жылых дамоў. Трэба ўмела лічыць затраты на цывілізаванае выкананне работ па ўтрыманні горада ў парадку, каб сродкаў хапіла на ўсё,— зазначыў Аляксандр Іванавіч.
Перамога ў конкурсе з’яўляецца не толькі маральнай, але і фанансавай падтрымкай Пружан. Разам з вымпелам горад атрымаў важкі грашовы дадатак — 47,8 мільёна рублёў, якія будуць расходаваны перш за ўсё на набыццё новага абсталявання для яго далейшага добраўпарадкавання.
Ганна Хадаровіч, Аляксандр Мелеш (фота).