Чытачам “Раённых будняў”, напэўна, ужо вядома, што ў перыяд з 1 да 14 чэрвеня 2014 года ў нашым рэгіёне будзе адключана аналагавае тэлебачанне. Іншымі словамі кажучы, прымаць тэлепраграмы можна будзе толькі ў так званым лічбавым фармаце. А гэта азначае, што карыстацца можна будзе або тэлевізарамі, якія маюць лічбавы цюнер, або, калі ў тэлепрыёмніка няма такога цюнера, — толькі з дапамогай спецыяльнай прыстаўкі да яго.
Большасці жыхароў нашага раёна гэтую праблему трэба вырашаць самастойна: набываць тэлепрыёмнік з убудаваным цюнерам ці прыстаўку да старога тэлевізара. Ужо цяпер з новай тэлевежы, якая пабудавана у Купліне, можна прымаць дзяржаўныя каналы ў лічбавым фармаце.
Сітуацыя ў саміх Пружанах будзе складвацца па-рознаму — для тых, хто карыстаецца кабельным тэлебачаннем, і для тых, хто не з’яўляецца яго абанентам.
Як запэўнівае старшыня ПВК “Зодчы” Іван Мартынюк, абаненты кабельнага тэлебачання ніякіх перамен практычна не заўважаць. Справа ў тым, што першапачаткова станцыя кабельнага тэлебачання “Зодчы” прымала сігнал у лічбавым фармаце, а затым пераўтварала ў аналагавы, які “чытаецца” ўсімі тэлевізарамі, без якіх-небудзь дадатковых устройстваў і ўбудаваных цюнераў. Гэты сігнал так і будзе трансліравацца далей. Акрамя таго, з 1 лістапада 2013 года ў той жа сетцы, г.зн. па тым жа кабелі, які заходзіць да абанента, транслююцца і каналы ў лічбавым фармаце. Тыя, у каго ёсць тэлевізары з неабходным убудаваным устройствам, а таксама тыя, хто набыў лічбавую прыстаўку, могуць ужо глядзець і лічбавыя каналы.
—Цяпер, — зазначае Іван Мартынюк, — мы транслюем 20 каналаў у лічбавым фармаце. У гэты пакет уключаны ўсе нацыянальныя тэлеканалы і дадатковыя, якія могуць адроз-нівацца ад аналагавых. У далейшым іх колькасць будзе павялічвацца.
Як адзначае Іван Аляксеевіч, розніцу ў якасці адлюстравання на большасці тэлевізараў у абанентаў КТБ “Зодчы” могуць вызначыць толькі спецыялісты, таму тым, хто не можа глядзець тэлеканалы ў “лічбе”, хвалявацца за якасць паказу не варта.
Мікола Антонаў.