Незвычайнае відовішча давялося бачыць пружанцам на гарадскім возеры ў мінулую суботу, дзе маладыя людзі дэманстравалі свае прыгожыя спартыўныя целы.
Такім чынам атлетычнага целаскладу хлопцы і дзяўчаты не толькі з Беларусі, але і з Расіі бралі ўдзел у Першым адкрытым пляжным турніры па культурызму і фітнэсу “Muscul & Model fest 2015”. Арганізатарам мерапрыемства выступіла Беларуская федэрацыя мадэльнага фітнэсу і культурызму.
Адметна, што мерапрыемства для культурыстаў, якое ўпершыню праводзілася ў Беларусі, прайшло менавіта ў Пружанах. Бо, як адзначыў прэзідэнт WFF-WBBF Еўропы старшыня Беларускай федэрацыі мадэльнага фітнэсу і культурызму Уладзімір Курыльчык, менавіта ў раённай выканаўчай улады Пружанскага раёна словы не разышліся са справай: у нашым райцэнтры было ўсё як след арганізавана і для ўдзелу спартсменаў у турніры, і для іх адпачынку.
— Пружаны робяць свой уклад у развіццё фізкультуры і спорту, — адкрываючы мерапрыемства, адзначыў намеснік старшыні райвыканкама М.П.Кудравец. – Не выпадкова і гэтыя спаборніцтвы праходзяць у нас. У Беларусі ўвогуле шмат робіцца для развіцця спорту. У гэтым плане не адстае і наш райцэнтр, дзе развіваюцца многія віды спорту, сярод якіх хакей, футбол, валейбол, фігурнае катанне, лёгкая атлетыка. Робіцца ўсё магчымае для прыцягнення маладых лю-дзей да здаровага ладу жыцця.
Варта адзначыць, што спаборніцтвы па культурызму і фітнэсу, якія праходзілі на пляжы гарадскога возера, сталі відовішчным шоў. Маладыя людзі дэманстравалі не толькі свае мускулы, але і ўменне рухацца і трымацца на подыуме, якім часова стаў пірс. Зграбныя дзяўчаты паўсталі перад гледачамі не толькі ў купальніках, але і ў вячэрніх уборах, што надало турніру асаблівае хараство.
Сярод удзельнікаў былі надзвычай тытулаваныя спартсмены, чэмпіёны Еўропы і нават свету. Тым ганаровей было аказацца сярод іх і пружанскім культурыстам – ваеннаслужачым Аляксею Марычаву і Андрэю Круглені, якія, па іх прызнанні, ад заняткаў у трэнажорнай зале Воднага палаца атрымліваюць не толькі фізічнае, але і маральнае задавальненне і з’яўляюцца прыхільнікамі здаровага ладу жыцця. Займаюцца спортам мужчыны не адзін год і дабіліся ідэальных прапорцый, надзвычай прыгожых атлетычных постацей.
У іх кагорце яшчэ адзін спартсмен, які на турніры прадстаўляў наш рэгіён, і пра якога хочацца сказаць асобна. Гэта – адзінаццаці-класнік з Новых Засімавічаў Дзяніс Семаковіч. Шчыра кажучы, мяркуючы па яго дасканалым, фізічна развітым целе, я нават засумнявалася, што ён школьнік. А на пытанне, што прымусіла так шчыльна заняцца спортам і сабой, хлопец сціпла прызнаўся: “На ўроках фізкультуры раней не мог падцягнуцца”. Праз тры гады плённых заняткаў у трэнажорнай зале Воднага палаца яму няма роўных не толькі ў класе, але, думаю, і наогул сярод аднагодкаў у раёне. На просьбу выказаць пажаданні сваім равеснікам, Дзяніс кажа:
— Кідайце курыць і займайцеся спортам!
Членам журы, якое прадстаўлялі знаўцы культурызму і фітнэсу з Беларусі і Расіі, вызначыць пераможцаў было няпроста. Аднак яны ўсё ж былі названы. Перамогу ў намінацыі “Мадэльны фітнэс, клас 1” заваявала прадстаўніца г.Бабруйска Аляўціна Салдаева. У гэтай жа намінацыі ў класе 2 лепшай стала Зінаіда Усікава з Брэста, а ў класе “постаць” – Іна Рыбакова з Мінска. У намінацыі “Культурызм” перамогу атрымаў прадстаўнік Расіі Максім Бармін, а ў намінацыі “Мадэльны культурызм” – гамяльчанін Дзяніс Качур (мяркуючы па рэакцыі публікі, ён асабліва спадабаўся прысутным). Таксама былі вызначаны “Міс” і “Містэр” турніру: Зінаіда Усікава (Беларусь) і Максім Бармін (Расія). 
Задаволены прыёмам і арганізацыяй турніру, старшыня Беларускай федэрацыі мадэльнага фітнэсу і культурызму Уладзімір Курыльчык прызнаўся, што хацеў бы і надалей бачыць правядзенне падобных спаборніцтваў у Пружанах.
— У сваю чаргу мы будзем радаваць пружанцаў удзелам цудоўных спартсменаў, — адзначыў ён.
Галіна Каляда, Сяргей Талашкевіч (фота).