Выпадак
Хачу праз газету выказаць крытыку ў дачыненні да нашых камунальных служб. Аднойчы днём да мяне завітаў малады чалавек, які прадставіўся інжынерам з «Водаканала» і пераканаўча даказаў з дапамогай фільтрацыйнай устаноўкі, што ў нашай вёсцы вельмі дрэнная пітная вада. Як патлумачыў госць, зараз па раёне камунальнай службай праводзяцца мерапрыемствы, накіраваныя на паляпшэнне забеспячэння насельніцтва вадой, у рамках якога па сабекошту прапануюцца спецыяльна прызначаныя для нашай мясцовасці фільтры коштам… сем мільёнаў рублёў. На маю думку, гэта сапраўдны здзек з вяскоўцаў!
Міхаіл, в.Лінова.
Адказ
Як паведаміў намеснік дырэктара КУВП «Камунальнік» В.І.Казлоў, ніякіх падобных мерапрыемстваў камунальная служба раёна не праводзіць у населеных пунктах. Пра ўсе свае намеры і планы прадпрыемства заўсёды даносіць да жыхароў раёна з дапамогай раённай прэсы.
— Хутчэй за ўсё па людзях ходзяць розныя махляры, якія часта называюцца прадстаўнікамі розных службаў,— зазначыў Віталій Ігаравіч.
***
Гэту інфармацыю пацвердзіў і начальнік райаддзела міліцыі С.А.Марковіч:
— Штогод прыходзяць паведамленні аб страце грошай, ювялірных вырабаў і іншых каштоўных рэчаў пасля наведвання розных прадстаўнікоў то «газавай», то «сацыяльнай» службы. Магчыма, махляры ўзялі на ўзбраенне новы метад падмана грамадзян.
Таксама могуць такім чынам заходзіць і розныя так званыя каміваяжоры, якія прапануюць розныя тавары. Як правіла, і з такімі лепш не заводзіць спраў, бо тавар, часцяком, вельмі нізкай якасці або ўвогуле недзеючы.
Хачу папярэдзіць грамадзян, каб яны захоўвалі асцярожнасць: заўсёды правярайце дакументы, або тэлефануйце ў названыя службы, каб праверыць інфармацыю. Можна звяртацца і ў дзяжурную часць, бо хутчэй за ўсё ніякага дазволу на такі від гандлю ў заезджых «камерсантаў» не будзе.
Меркаванне
Нашы калегі з Брэста папярэдзілі, што ў абласным цэнтры зараз назіраецца сапраўдная хваля на такія лжывыя фільтрацыйныя ўстаноўкі. Працэдура падману распрацавана на «выдатна». Праводзячы няхітры хімічны эксперымент (электраліз), «спецыялісты» прадэманструюць колькасць асадкаў у вадзе, панаракаюць на дрэнную якасць вашага водазабеспячэння. І тут жа прапануюць рашэнне праблемы.
Як сцвярджаюць супрацоўнікі санітарна-гігіенічнай службы, метад вымярэння якасці вады электралізам ненавуковы. Ён разлічаны выключна на візуальны эфект. да тагож было праведзена даследаванне так званых фільтраў, і спецыялісты паставілі пад сумненне іх карысць: прыборы не разлічаны на ачыстку бытавой вады. Другімі словамі, на самой справе вядзецца ашуканства, каб падманутыя кліенты выкідвалі вялікія грошы.
Алег Сідарэнка.