Хваля цікавасці злодзеяў да аўтамабільных рэгістрацыйных знакаў прыйшла і да нас: восенню была зарэгістравана серыя крадзяжоў з машын у Брэсце і ў Пружанах. Як паказвае практыка, такі бізнэс вельмі прыбытковы. Пакаранне нязначнае, а «прэміяльныя» з уладальнікаў аўто перакрываюць усе рызыкі. У выніку аўтамабілістам трэба самастойна клапаціцца аб захаванасці нумароў. Хто можа пацярпець у першую чаргу? У зоне павышанай рызыкі — уладальнікі аўтамабіляў з выдадзенымі ў іншай вобласці або проста «прыгожымі» нумарамі. У першым выпадку — машына надоўга застанецца на прыколе (для пераафармлення трэба ехаць у «родны» рэгіён), у другім — кошт новай выдачы можа значна перавышаць зламысніцкія страты. Таксама прыцягваюць увагу і дарагія аўтамабілі, гаспадары якіх не стануць «замарочвацца» і лепш заплацяць выкуп.
Зрэшты, уладальнікі звычайных нумароў таксама не застрахаваны ад непрыемнасцей.
Што ж рабіць? Адказ просты: трэба ахоўваць сваю маёмасць самому.
Па-першае, гэта антывандальныя або жалезныя рамкі, як правіла, выкананыя з нержавеючай сталі. Мацуюцца больш цвёрда да бампера, нумар фіксуецца альбо канструкцыяй, якая закрывае перыметр, альбо сакрэтнымі мацаваннямі. Недахопы: шурупы не забяспечваюць належнай абароны, таму тымі ж самымі абцугамі злодзеі пазбаўляюць уладальніка аўтамабіля не толькі нумара, але яшчэ і антывандальнай рамкі, а бампер або крыло багажніка атрымліваюць пашкоджанні з-за выдраных з коранем мацаванняў.
Па-другое, сігналізацыя, калі ў звычайную нумарную рамку ўбудоўваюцца датчыкі, падключаныя да штатнай сістэмы сігналізацыі. Пры набліжэнні або дотыку да бампера спрацоўвае сірэна. Недахопы: зняць або адарваць нумар можна за секунды, ніякая сірэна злодзеяў не спалохае.
Па-трэцяе, самае геніяльнае, якое заўсёды найбольш простае. Досыць схадзіць у бліжэйшы мэблевы або будаўнічы магазін і купіць звычайныя шурупы з гладкім капялюшыкам плюс гайкі і шайбы. Ніякіх адвёртак або абцугоў яны не баяцца, а на іх адкручванне спатрэбіцца пэўны час, які злодзеі не заўсёды імкнуцца траціць.
Падрыхтаваў Алег Сіддарэнка.