У рамках праекта “Актыўныя гульнёвыя віды спорту ў Еўрарэгіёне “Белавежская пушча” з 3 па 5 ліпеня на тэрыторыі нашага раёна быў праведзены міжнародны велапрабег.
Яго ўдзельнікі – жыхары Гайнаўскага павета, Беластока і Варшавы, праз польска-беларускую мяжу ў Белавежскай пушчы адразу накіраваліся ў г.п.Шарашова. Пасля азнаямляльнай эскскурсіі па пасёлку, польскія веласіпедысты рушылі ў накірунку Пружан, па дарозе наведаўшы царкву ў в.Засімавічы.
У райцэнтры нашы замежныя суседзі, якіх вітала кіраўніцтва раёна, далучыліся да святочных мерапрыемстваў з нагоды Дня Незалежнасці. Разам са старшынёй райвыканкама М.М.Крэйдзічам госці ўсклалі кветкі да помніка спаленым вёскам.
А потым было наведванне Лядовага і Воднага палацаў, госці паглядзелі святочны канцэрт і феерверк.
Далейшы маршрут падарожнікаў пралёг праз вёску Казлы ў Лыскава, дзе яны наведалі магілу Францішка Карпінскага, рэшткі касцёла і праз Магілёўцы, дзе раней была сядзіба Дзяконскіх, накіраваліся на Паперню. Завяршыўся вела-прабег у Ружанах наведваннем палаца Сапегаў.
Як пасля падзяліліся сваімі ўражаннямі госці, яны засталіся надзвычай задаволенымі веламаршрутам па тэрыторыі раёна, а таксама ўражаны архітэктурна-культурнай спадчынай, з якой давялося азнаёміцца на Пружаншчыне.
Галіна Каляда, фота аўтара.