Удзел у акцыі, якая праходзіць па краіне, прынялі члены БРСМ і грамадскага аб‘яднання “Белая Русь”, піянеры. Значнасць падзеі падкрэслівала прысутнасць прадстаўнікоў улады і ветэранаў.
— Сёння мы аддаем даніну памяці загінуўшым і выказваем павагу нашым ветэранам, — сказаў намеснік старшыні райвыканкама М.П.Кудравец. – Алея, якая будзе закладзена ў парку да 70-годдзя Вялікай Перамогі, сведчыць і пра дачыненне да гэтай падзеі сённяшняга маладога пакалення. Спадзяюся, што вы будзеце дастойнымі грамадзянамі нашай краіны, якія з павагай ставяцца да яе гісторыі і робяць нашу дзяржаву больш багатай і прыгожай.
Пра шчасце жыць пад мірным небам гаварылі таксама старшыня раённага савета ветэранаў М.Я.Дулько, ветэран Вялікай Айчыннай вайны І.М.Алякумаў.
Дваццаць каштанаў, якія пасадзіла моладзь у парку, будуць сведчыць пра павагу да пераможных гераічных падзей Вялікай Айчыннай вайны. 
На здымку: разам са школьнікамі працуе С.С.Карпей, былы малалетні вязень канцлагера ў Азарычах.
Галіна Каляда, фота Сяргея Талашкевіча.
2015-ы — знамянальны год для беларусаў: 9 мая мы будзем адзначаць 70-годдзе Вялікай Перамогі. Невыпадкова, што ўся выхаваўчая работа ў сёлетнім навучальным годзе ў школах праходзіць пад знакам гэтай важнай падзеі.
На тэрыторыі Ружанскага пассавета дзейнічае савет ветэранаў вайны і Узброеных сіл пад кіраўніцтвам У.А.Папова. Хоць ветэранаў і асоб, прыраўняных да іх, становіцца ўсё менш, аднак ёсць людзі ў гэтай арганізацыі, якія з’яўляюцца частымі гасцямі ў школе, дапамагаюць выхоўваць маладое пакаленне на слаўных баявых традыцыях беларускага народа.
На мой погляд, дзясятага красавіка ў г.п.Ружаны адбылася важная падзея: на беразе пасялковага возера з’явілася алея Славы ў гонар 70-годдзя Перамогі. У закладцы алеі прынялі ўдзел вучні Ружанскай СШ — члены маладзёжнай грамадскай арганізацыі «БРСМ». Былі запрошаны ветэран вайны М.М.Францэвіч, старшыня Ружанскага пасвыканкама Г.М.Верхавец і дэпутат пасялковага Савета дэпутатаў А.У.Манчык.
Безумоўна, такія памятныя мерапрыемствы — справа вельмі патрэбная. Мікалай Міхайлавіч расказаў пра гады свайго юнацтва, якія прыпалі на ваеннае ліхалецце. Па-добраму пазайздросціў ветэран сучаснай моладзі, перад якой адчынены ўсе дзверы. З цікавасцю вучні разглядалі ўзнагароды М.М.Францэвіча.
Ганаровае права пасадзіць першае дрэўца на алеі было прадстаўлена Мікалаю Міхайлавічу (на здымку). Усяго ж на беразе возера ў гэты дзень было пасаджана 70 бярозак. Спадзяемся, што праз некалькі год тут будзе сапраўдны бярозавы гай.
Вера Наумік, намеснік дырэктара па выхаваўчай рабоце Ружанскай СШ.