90-годдзю беларускага кіно прысвячалася вечарына, наладжаная ў кінатэатры «Спадарожнік».
Вядучыя нагадалі, што менавіта 17 снежня 1924 года ў Мінску была створана першая беларуская кінастудыя, якая ў далейшым атрымала назву “Беларусьфільм”, расказвалі аб славутых рэжысёрах і фільмах, якія зрабілі пэўны ўклад у гісторыю не толькі беларускага, савецкага, але і сусветнага кінематографа. Узгадвалі, што ў 1962 годзе – пасля аб‘яднання Пружанскага, Ружанскага і Шарашоўскага раёнаў – была створана дырэкцыя раённай кінасеткі. Першым яе дырэктарам быў Мікалай Кліменцьевіч Яворскі. У 1970 годзе яго змяніў М.А. Сіманкоў, а з 1971 да 1989-га пасаду дырэктара займаў Віктар Мікалаевіч Мігіц. Апошнія 25 гадоў кінавідэа-прадпрыемства бяззменна ўзначальвае Уладзімір Уладзіміравіч Люсько.
Цёпла віншавалі калектыў з юбілейнай датай намеснік старшыні райвыканкама М.П.Кудравец, начальнік аддзела ідэалагічнай работы, культуры і па справах моладзі К.І.Панімаш, самадзейныя артысты дарылі цудоўныя песні і танцы. І нібы на кінаэкране паўставалі ў памяці кадры не такога ўжо далёкага мінулага…
—Кіншчыкі прыехалі! Кіншчыкі прыехалі! – светлавалосая дзяўчынка з растрапанымі коскамі бегла ўздоўж вясковай вуліцы. Сонца павольна сядала за рэку, фарбуючы ваду ў кісельны колер. Вяскоўцы заканчвалі ўпраўляцца па гаспадарцы, хуценька пераапраналіся ў “выхадныя” сукенкі і кашулі і спяшаліся ў клуб. Дзеці шумнай стайкай, сціснуўшы ў кулачку запаветныя 10 капеек, беглі наперадзе. Ня-хітрай гукавой “рэкламы” хапіла, каб сціплае памяшканне клуба запоўнілася. Гасла святло, стракатаў кінаапарат, гледачы затойвалі дыханне, захопленыя прыгодамі героеў…
Гэта – не фантазія. У 1975-1990-х гадах у раёне працавала 81 кінаўстаноўка, штат кінасеткі складаўся са 110 чалавек. За год кінапаказы наведвалі больш за мільён чалавек. А ветэраны кінасеткі і цяпер, смеючыся, называюць сябе “кіншчыкамі”.
На святочнай імпрэзе пайменна ўспомнілі тых, хто шмат гадоў прысвяціў гэтай прафесіі. Падзячныя пісьмы атрымалі Раіса Рыгораўна Вакула, Вольга Сцяпанаўна Койпіш, Уладзіслава Дзмітрыеўна Шырма, Іван Сцяпанавіч Зірко, Павел Іванавіч і Ангеліна Станіславаўна Фасевічы, Таццяна Іванаўна Богдан, Зінаіда Уладзіміраўна Раманоўская, Лідзія Фёдараўна Псярцэвіч, Вольга Андрэеўна Дземідовіч.
Узнагароды розных узроўняў уручылі і ўсім сённяшнім работнікам прадпрыемства. Не дзіўна, у штаце цяпер усяго 12 чалавек. Вясковым кінаўстаноўкам прыйшлі на змену DVD-прайгравальнікі, кам-п‘ютары і нават хатнія кінатэатры. Ды і гарадскі “Спадарожнік” не часта збірае поўныя залы.
Але ў кінатэатры ўпэўнена ўкараняюцца новыя тэхналогіі: фармат 3D стаў паўсядзённасцю, робяцца паказы 5D, закуплены шлемы віртуальнай рэальнасці… Так што кінапракат па-ранейшаму запатрабаваны.
На здымках: «Вось такой тэхнікай мы некалі карысталіся», — расказвае У.У.Люсько; відэадэманстратар кінатэатра «Спадарожнік» Ж.У. Зяйрук.
Ірына Сядова, фота аўтара.