Для многіх вадзіцеляў, якія ў той сакавіцкі дзень праязджалі па вуліцы Будаўнічай, было дзіўна бачыць побач з супрацоўнікамі ДАІ і свяшчэннаслужыцеля. А тыя, хто спыняўся па сваіх справах, перажылі і некалькі хвілін страху, мяркуючы, што зараз атрымаюць штраф. Але, хаця парушэнні сапраўды мелі месца, супрацоўнікі дзяржаўтаінспекцыі разам з айцом Ігарам Мрыхіным (які, дарэчы, з’яўляецца добраахвотным дружыннікам пры аддзяленні ДАІ) праводзілі толькі тлумачальную работу.
Як расказаў старшы дзяржаўтаінспектар А.А.Кабрынец, у раёне, згодна са статыстыкай, не зніжаецца колькасць дарожна-транспартных здарэнняў з удзелам пешаходаў, пачасціліся выпадкі траўмавання людзей на «зебры». Прычына такой сітуацыі банальная — грэбаванне правіламі дарожнага руху. Прычым парушаюць не толькі вадзіцелі, але і самі пешаходы.
За некалькі гадзін інспектары правялі тлумачальныя гутаркі з паўсотняй вадзіцеляў, кожнаму была ўручана памятка аб неабходнасці выконваць адпаведныя патрабаванні, а таксама з адказнасцю за іх парушэнне. Айцец Ігар уручаў «Малітву вадзіцеля».
Нельга не ўзгадаць і правілы перавозкі дзяцей, бо пост ДАІ дзяжурыў каля дзіцячага садка. Прызнацца, толькі некалькі вадзіцеляў выконваюць адпаведныя правілы, перавозячы сваіх дзяцей у спецыяльных аўтакрэслах. Мала таго, што некаторыя не карыстаюцца імі, дык нават садзяць малых на пярэдняе пасажырскае сядзенне.
На здымках: тлумачальная гутарка — і малітва ў дарогу; нямногія бацькі садзяць дзіця ў аўтакрэсла.
Алег Сідарэнка.